СКОПЈЕ (АА) - Собранието на Северна Македонија не успеа да одржи расправа и гласање за иницијативата на опозицијата за гласање недоверба на Владата поради немање доволен кворум, јавува Агенција Анадолија (AA).
На седницата која започна во 11 часот, од вкупно 120 пратеници во македонското Собрание, не беа присутни 61 пратеник, па претседателот на Собранието Талат Џафери направи пауза до постигнување на кворум, пауза која постојано беше продолжувана во текот на целиот ден.
Иако опозицијата предводена од ВМРО-ДПМНЕ при доставување на иницијативата имаше обезбедено 61 пратенички потпис, проблемот се појави откако еден од пратениците, Кастриот Реџепи, денеска преку социјалните мрежи објави дека нема да гласа за уривање на Владата и не се појави во Собранието.
Опозицијата ја обвини власта дека го „киднапирала“ пратеникот, а Движењето Беса, партијата на која ѝ припаѓа пратеникот Реџепи, случајот го пријави во полиција, наведувајќи дека не знаат каде се наоѓа пратеникот.
Подоцна во текот на денот, пратеникот Реџепи имаше видео обраќање на социјалните мрежи, во кое повторно порача дека нема да гласа за рушење на Владата, но без да каже каде се наоѓа.
Потоа, пратениците од опозицијата го напуштија Собранието обвинувајќи ја власта дека со криминални методи се обидува да остане на власт, додавајќи дека бараат одржување на предвремени парламентарни избори.
Во меѓувреме, пратениците од парламентарното мнозинство ја обвинија опозицијата дека тие му се закануваат на пратеникот Реџепи, изразувајќи уверување дека парламентарното мнозинство во иднина ќе се зголеми.
На крајот од рокот за затворање на седницата, односно околу полноќ, претседателот на Собранието констатира дека седницата е затворена и дека опозицијата не успеала да формира кворум за уривање на Владата.
