Melike Pala
11 Декември 2023•Ажурирај: 13 Декември 2023
ХАРИСБУРГ (АА) - Ректорката на Универзитетот во Пенсилванија, Лиз Мегил, која ја бранеше слободата на изразување во протестите против Израел, поднесе оставка по критиките и притисоците, известува Анадолу.
Оставката е поднесена по критиките и притисоците по сведочењето пред Одборот за образование и работна сила на американскиот Конгрес, за пристапот кон антисемитските инциденти во кампусот.
„По изјавата во Конгресот стана јасно дека позицијата на Мегил повеќе не е одржлива. Таа и јас заеднички одлучивме дека е време да си замине“, рече претседателот на Одборот на доверители, Скот Бок, во изјава во која ги најави својата и оставката на Мегил.
Универзитетот најави дека Мегил ќе остане постојан член на Универзитетот на Правниот факултет Кери, а Мегил се согласи да ја продолжи својата функција додека не биде именуван привремен ректор.
„Една замина, две останаа. Ова е само почеток на решавање на постоечкиот трулеж на антисемитизам кој ги уништува најпрестижните институции на високото образование“, рече републиканската конгресменка Елис Стефаник, која е во Комисијата.
На 8 декември донаторот Рос Стивенс ѝ се закани на управата на Универзитетот дека ќе ја повлече својата донација од 100 милиони долари со образложение дека „не е покажана потребната реакција на инцидентите на антисемитизам“ во кампусот.
Мегил, Клодин Геј, ректорката на Универзитетот Харвард, и Сели Корнблут, ректорката на МИТ, се повикани на сослушување во Конгресот на САД на 5 декември да одговорат на прашањата за нивниот пристап за антисемитските инциденти во универзитетските кампуси.
Геј, Мегил и Корнблут, кои се на чело на ректоратите од минатата година, изјавија дека ќе се борат против растот на сите облици на антимуслиманско расположение и омраза.
По нападот на Хамас врз Израел на 7 октомври, американското Министерство за образование започна повеќе истраги за наводите за инциденти на омраза во универзитетските кампуси.
