Литванскиот премиер поднесе оставка што доведе до пад на Владата

ИСТАНБУЛ (AA) – Премиерот на Литванија, Гинтаутас Палуцкас, денес ја објави оставката од функцијата, со што автоматски следува и распуштање на неговиот Кабинет, соопшти државниот јавен сервис ЛРТ, јавува Анадолу.

„Со одлуката да поднесам оставка од премиерската функција ја известувам јавноста дека деветнаесеттата Влада на Литванија поднесува оставка“, рече Палуцкас на владината седница.

Тој официјално ќе ја поднесе оставката до претседателот Гитанас Науседа, кој има рок од 15 дена да предложи нов кандидат за премиер пред Парламентот.

Откако пратениците ќе го одобрат новиот премиер, тој ќе има уште 15 дена за да формира нов владин Кабинет и да презентира програма за работа.

Актуелната Влада е составена од трипартиска коалиција, која има 86 пратеници во литванскиот Парламент со 141 член. Се очекува оваа коалиција да претрпи одредени измени при формирањето на новата влада.

Палуцкас во четвртокот најави оставка и од лидерската функција во Литванската социјалдемократска партија (ЛСДП) откако претседателот Науседа му даде рок од две недели за јавно појаснување на сомневањата поврзани со негови претходни бизнис-активности и наводни етички прекршувања или да поднесе оставка.