Gökhan Ergöçün
04 Август 2025•Ажурирај: 05 Август 2025
ИСТАНБУЛ (АА) - Околу 3.200 висококвалификувани вработени во „Боинг“ одлучија да стапат во штрајк, објави денес синдикатот на Меѓународното здружение на машински работници и работници во воздухопловството (ИАМ), јавува Анадолу.
„Во 'Боинг' 3.200 високообучени членови на синдикатот ИАМ на полноќ започнаа штрајк затоа што - беше доста“, соопшти синдикатот на социјалната мрежа X.
Во неделата синдикатот објави дека неговите членови гласале против модифицираниот четиригодишен договор за работни односи што „Боинг“ го понуди како нов предлог.
Синдикатот порача дека работниците заслужуваат договор што ја одразува нивната стручност, посветеност и критичната улога што ја имаат во националната одбрана.
„Стоиме рамо до рамо со овие работнички семејства во нивната борба за фер услови и почит на работното место“, изјави Том Боелинг, претставник на синдикатот.
Минатата недела „Боинг“ достави нов предлог-договор со мали измени во надоместокот како замена за претходниот. Новата понуда вклучуваше просечно зголемување на годишната плата од 75.000 на 102.600 долари.
