Бектеши: „Граѓаните и индустријата да штедат енергија за да се олесни работата на домашните капацитети“

СКОПЈЕ (АА) – Министерот за економија на Северна Македонија, Крешник Бектеши, истакнувајќи дека се прифатени речиси сите барања на бизнис-секторот за електричната енергија, додаде дека тие ќе стапат во сила од 1 август, со воведувањето на кризната состојба, јавува Агенција Анадолија (АА).

Министерот за економија, Крешник Бектеши, денеска во просториите на Стопанската комора на Северна Македонија одржа работна средба со заменик-претседателот на Стопанската комора и претседател на Македонската енергетска асоцијација (МЕА), Кочо Анѓушев и претседателот на Регулаторната комисија за енергетика, Марко Бислимовски.

По средбата, Бектеши, Анѓушев и Бислимовски дадоа изјави за медиумите.

Наведувајќи дека барањата на бизнис-секторот за електрична енергија се прифатливи за Владата, министерот рече дека ќе почнат со спроведување од почетокот на август, со прогласувањето на енергетската криза.

Бектеши во изјавата за медиумите упати апел до сите граѓани и до индустријата да се заштеди што повеќе електрична енергија.

„Упатувам повик до сите граѓани и до индустријата да се заштеди што повеќе електрична енергија, имајќи предвид дека на таков начин ќе ја олесниме работата на домашните капацитети, за да можат да покријат и дел на регулираниот пазар и дел на слободниот пазар на електрична енергија“, рече Бектеши.

Министерот, исто така, упати повик и до опозицијата да биде конструктивна и да овозможи реализирање на мерките за поддршка на стопанството.

„За да се усвои уредба, мора прво да се прогласи енергетска криза. Без прогласување на енергетска криза, такви уредби, такви мерки согласно со Законот за енергетика, Владата не може да усвои“, додаде Бектеши.

Кочо Анѓушев, истакнувајќи дека Македонската енергетска асоцијација (МЕА) минатата недела ги разгледала моменталните состојби во енергетиката, рече дека поднеле неколку барања до Владата.

Тој посочи дека Асоцијацијата од Владата бара зелената енергија да се врати за индустријата, како што беше минатата година, рече:

„Нашата иницијатива е таа енергија повторно да се врати само за индустријата и со тоа, значи, македонската економија којашто е на слободен пазар, да добие некои дополнителни 7 до 8 проценти од својата електрична енергија на годишно ниво по некои прифатливи и добри цени.“

Меѓу другото, Анѓушев истакна дека од Владата бараат преку компаниите, пред сѐ од МЕПСО, да искомуницира со владите на Србија и Република Бугарија во текот на зимскиот период да не се затворат границите за увоз на електрична енергија, бидејќи тоа би било исклучително неповолно за целиот енергетски систем и би довело до последици што би биле посериозни.

Претседателот на Регулаторната комисија за енергетика (РКЕ), Марко Бислимовски, најавувајќи ги новите цени на горивата, рече дека дизелот од полноќ ќе поевтини за два денари.