ЛОНДОН (АА) - Турските одбранбени компании ги изложија своите најнови производи, меѓу кои и системите за противвоздушна одбрана, на познатиот саем за одбрана и безбедност во британскиот главен град, јавува Анадолу.
Речиси 30 компании учествуваат на Меѓународниот саем за одбрана и безбедност (ДСЕИ) што се одржува во лондонскиот центар ЕксЦел од 12 до 15 септември.
Оваа година биеналниот настан е домаќин на над 2.800 добавувачи од областа на одбраната и безбедноста, со над 230 нови излагачи.
Компаниите од турската одбранбена индустрија оставија значаен белег на ДСЕИ 2023, со приближно 30 компании, меѓу кои се и гигантите АСЕЛСАН, ХАВЕЛСАН, БМЏ и Рокетсан, кои ги прикажаа своите иновации, истакнувајќи ја растечката улога на Туркије во глобалниот одбранбен сектор.
- Деби на системот за противвоздушна одбрана КОРКУТ -
Во ексклузивното интервју за Анадолу, Ахмет Акјол, челникот на одбранбениот гигант АСЕЛСАН со седиште во Анкара, рече како меѓународна компанија, присуството на АСЕЛСАН на саемот со своите основни производи е од витално значење за Туркије.
Тој се осврна на важноста на системите за противвоздушна одбрана, кои привлекоа глобално внимание од почетокот на руската војна против Украина.
„Го изложивме нашиот систем за противвоздушна одбрана КОРКУТ, кој го развивме за турските вооружени сили, првпат на меѓународната сцена.“
Потсетувајќи дека компаниите развиле и системите СИПЕР, ХИСАР, како и антидрон системите што го дополнуваат семејството, наречени „ГОККУББЕ“, Акјол нагласи дека на саемот го прикажуваат и концептот на овие системи.
„Додека Туркије ги додава своите национални производи во системите за противвоздушна одбрана во својот инвентар, исто така, го потпишува и унапредува извозот на овие производи со пријателски и сојузнички земји“, истакна Акјол.
На ДСЕИ, АСЕЛСАН, исто така, дебитираше со своите нови комплети за ласерско водење, ГОЗДЕ, и новата генерација на САРП, далечински управуван стабилизиран систем за оружје.
„Додека ги изложуваме нашите производи овде, исто така, продолжуваме да бараме нови соработки, преговори, договори со нашите меѓународни партнери“, додаде тој.
- „Ова е навистина пријатен и горд настан за нашата земја и нашите компании“ -
ХАВЕЛСАН, уште една водечка турска одбранбена компанија, учествува на ДСЕИ со изложување на својот широк асортиман на производи, вклучително и најсовремените технологии Ц4ИСР за копнени, воздушни и поморски подрачја.
Генералниот директор на ХАВЕЛСАН, Мехмет Акиф Наџар, се осврна на важноста на саемот за компанијата и за Туркије.
„Како компании со седиште во Туркије достигнавме капацитет да произведуваме производи од светска класа и да ги изложуваме на такви големи саеми“, изјави тој за Анадолу.
Наџар рече дека презентирањето на производите од домашно, турско производство меѓу глобалните гигантски компании покажува колку далеку е развиена турската одбранбена индустрија.
„Како турска одбранбена индустрија сега достигнавме фаза во која можеме да продаваме производи и да изложуваме не само на ИДЕФ (Меѓународен саем за одбранбена индустрија), туку и на саеми што се прифатени низ целиот свет.“
„ХАВЕЛСАН ги изложува своите производи за автономни системи, воздушни, копнени и поморски производи, како и систем за командна контрола и управување со борби и производи за симулатори на годинашниот ДСЕИ“, истакна Наџар.
„Ова е навистина пријатен и горд настан за нашата земја и нашите компании“, додаде тој.
- Сериско производство на моторот ТУНА -
БМЏ, производител од турската одбранбена индустрија, успешно ја заврши првата задача за масовно производство на моторот ТУНА, изјави менаџерот на компанијата за време на саемот.
БМЏ на саемот го изложи својот мотор ТУНА со 400 коњски сили.
Мустафа Кавал за Анадолу изјави дека почнале со сериско производство на моторот ТУНА на почетокот на годината.
„Овој мотор ќе има различна примена, а првата е употреба на моторот ТУНА во возилата КИРПИ-2. Во таа насока, оваа недела ќе го пратиме нашиот прв произведен мотор во нашата фабрика во Измир. До крајот на годината ќе се сретне со возилото КИРПИ“, рече тој.
Кавал, исто така, спомена дека работата на групите за моќност од 1.000 и 1.500 коњски сили за возила со гасеници и текнот АЛТАЈ е во тек.
„Ние сме во разговори со потенцијални производители на возила. Имавме разговори и со компании што произведуваат поморски платформи. Имаме во план да ги користиме овие мотори што ги произведуваме за нашата земја и за пријателските и сојузничките земји.“
