Турските научници ја завршија 6. експедиција на Антарктикот максимално зачувувајќи го уникатниот екосистем

АНТАРКТИК (АА) - Спроведувајќи научни истражувања во рамките на 6. Национална научна експедиција на Турција на Антарктикот, турските истражувачи донесоа податоци и наоди, обидувајќи се да остават најмали траги на континентот, јавува Агенција Анадолија (АА).

Антарктик, петтиот најголем континент на светот со површина од 14,2 милиони квадратни километри, е едно од омилените места на истражувачите и научно-истражувачките тимови поради својата географија и природа.

Под покровителство на турското Претседателство, во соработка со Министерството за индустрија и технологија и Институтот за научно-технолошки истражувања на Турција (TUBITAK) - Институтот за поларни истражувања (МАМ), турските научници не само што ја осветлуваат иднината на земјата со својата работа туку и стануваат заштитници на животот со тоа што спречуваат оштетување на екосистемот на континентот и неговата околина.

Турските научници ја извршија својата работа според правилата утврдени во Системот на договори за Антарктикот, во кој се вклучени 54 земји и кој стапи на сила во 1961 година во согласност со условите наведени во Протоколот за заштита на животната средина од Договорот за Антарктикот прифатен во 2017 година.

Турските научници ја завршија својата работа зачувувајќи го живиот свет на континентот и неговата околина, максимално заштитувајќи го екосистемот во согласност со прописите на Министерството за животна средина, урбанизам и климатски промени засновани на Мадридскиот протокол од 1991 година, а потоа се вратија дома.

На Антарктикот, најстудениот континент на светот, дозволено е да работат само базите каде што се спроведуваат научни истражувања.

- Гаранции за во иднина -

И покрај ниските температури, Антарктикот е дом на многу животни, меѓу кои пингвини, фоки, китови и птици.

Со седиште во најјужниот дел од Јужната хемисфера и 98 проценти покриеност со мраз, континентот содржи 70 проценти од светските слатководни ресурси.

Постоечките морски ресурси на Антарктикот и слатководниот потенцијал скриен во неговите глечери се гледаат како дел од гаранциите за иднината на планетата.

- Одржување дистанца -

Едно од најважните прашања во научните активности на континентот е интеракцијата со живиот свет.

Во обид да не се направи никаква штета, задолжително е одржување дистанца на не помалку од 10 метри од дивиот свет на континентот.

Пред да стапнат на континентот, учесниците во научните експедиции се информирани за тоа колку е важно внимателно да се гази меѓу живиот свет кој никогаш немал контакт со луѓе, и да се работи со минимална бучава.

Животните на континентот се почувствителни, особено за време на периодот на размножување и мрестење, па на истражувачите им е кажано дека ако животното се приближува, полека да го зголемат растојанието без да го исплашат или во спротивно да останат мирни и да го остават животното да си оди по својот пат.

- Чувари на животната средина -

Атила Јилмаз, истражувач од Институтот за поларни истражувања, за Агенција Анадолија изјави дека Антарктикот има уникатен екосистем, и дека сакаат да го задржат тоа.

„Се трудиме да имаме службеник за животна средина за да ги почитуваме правилата за животна средина на нашите експедиции. Ова лице вообичаено надгледува дали работата која се спроведува во областа, ги следи правилата на регионот и презема одговорност во случај на еколошка несреќа. Процесот започнува пред експедицијата.“

„Учесниците мора да добијат различни дозволи за истражување на континентот и да земат примероци. Надлежен орган во оваа насока е Министерството за животна средина, урбанизам и климатски промени. Ние, исто така, ја обезбедуваме координацијата помеѓу учесниците на експедицијата и Министерството пред експедицијата.“

- Нема инвазивни видови -

Истакнувајќи дека работат на начин да не ги вознемируваат животните на кои наидуваат за време на нивната работа, Јилмаз рече:

„Многу е важно неавтохтоните видови да не се носат тука од други континенти со цел да се заштити екосистемот. Ги дезинфицираме нашите чизми со специјална течност веднаш штом ќе излеземе од авионот и ќе стапнеме на континентот.“

„Го повторуваме ова секој ден кога го напуштаме и се враќаме на бродот за да ја завршиме теренската работа. Даваме сѐ од себе за да ја заштитиме животната средина на Антарктикот во нашите научни експедиции и се трудиме да оставиме навистина минимална негативна трага на континентот.“