Alperen Aktaş
19 Декември 2024•Ажурирај: 20 Декември 2024
АНКАРА (АА) - Турскиот претседател Реџеп Таип Ердоган ги откри амбициозните планови на Туркије за основање постројка за производство на чипови суперспроводници, што значи револуционерен скок во способностите за квантно компјутерство на земјата, јавува Анадолу.
Истакнувајќи ги плановите на церемонијата на доделувањето научни награди на Турската академија на науките (ТУБА) и Советот за научни и технолошки истражувања на Туркије (ТУБИТАК), која се одржа во главниот град Анкара, претседателот Ердоган ја нагласи стратегиската важност на квантните технологии во обликувањето на глобалната иднина.
„Со овој клучен напредок во квантнотото компјутерство имаме цел да ја позиционираме Туркије како клучен играч на глобалната сцена“, рече тој, нагласувајќи дека таквиот развој ја одразува решеноста на земјата да биде лидер во најсовремените технолошки полиња.
Планираниот објект за чипови суперспроводници ќе биде корисен во производството на процесори со високи перформанси неопходни за квантните компјутери од следната генерација.
„Нашата фабрика за производство на чипови суперспроводници ќе го отвори патот за развојот на квантни компјутери со поголем капацитет“, рече турскиот претседател.
Оваа иницијатива тој ја нарече трансформативен чекор, посочувајќи дека квантните компјутери може да решат многу сложени проблеми за неколку минути - предизвици за кои на конвенционалните суперкомпјутери ќе им требаат години.
„Цел на Туркије е да се приклучи во рангот на 15 земји што се во првите редови на квантното компјутерство“, рече тој, нагласувајќи го значењето на воспоставувањето инфраструктура неопходна за напредни истражувања и развој.
- Поттикнување на научната извонредност -
Турскиот претседател ја истакна посветеноста на Туркије за поттикнување на научните иновации, оддавајќи им почит на достигнувањата на 57 научници наградени на церемонијата.
Тој ја нагласи важноста од препознавање и охрабрување на научните таленти, со цел поттикнување на националниот напредок.
„Научниот напредок бара охрабрување и ценење“, рече тој, црпејќи инспирација од зборовите на познатиот научник Ибн Сина: „Науката и уметноста мигрираат од местата каде што не се ценети.“
Ердоган ги повика академските институции, истражувачите и приватните компании да соработуваат и да ги поместат напред границите на иновациите.
Исто така, тој истакна дека научниот напредок на Туркије е поддржан со значителни инвестиции во образованието, истражувачката инфраструктура и јавно-приватните партнерства.
- Туркије како светилник на регионалната стабилност и лидерство -
За време на обраќањето турскиот претседател се осврна и на растечкото геополитичко влијание на Туркије и нејзината одговорност да дејствува како стабилизирачка сила во турбулентниот регион.
„Случувањата во Сирија нѐ потсетуваат дека Туркије е поголема од самата Туркије“, рече тој, алудирајќи на улогата на земјата во справувањето со регионалните кризи и хуманитарните предизвици.
„Не може да го ограничиме нашиот хоризонт на 782.000 квадратни километри“, рече Ердоган. „Како што човек не може да избега од својата судбина, така Туркије и турската нација не може да избегаат или да се скријат од својата предодредена улога во историјата.“
Турскиот претседател ги истакна дипломатските, воените и хуманитарните напори на земјата како примери за лидерството на Туркије во справувањето со регионалните и глобалните предизвици.
На крајот од обраќањето Ердоган истакна дека силата на нацијата не лежи само во нејзиниот технолошки и научен напредок туку и во нејзината трајна посветеност на правдата, стабилноста и напредокот.
