Gökçe Topbaş,Gülşen Çağatay
20 Октомври 2022•Ажурирај: 21 Октомври 2022
АНКАРА (АА) - Туркије има за цел да го зголеми својот капацитет за производство на соларни фотоволтаични (PV) панели на 20.000 мегавати (MW) до 2023 година и да стане еден од трите најдобри производители во светот во оваа област, изјави денеска извршниот директор на турската фабрика „Кајлон ПВ“, Ерсан Туфекчи, јавува Агенција Анадолија (АА).
За време на неговиот воведен говор на „БифиПВ 2022“ во зоната за организирана индустрија „Башкент“, Туфекчи рече дека Туркије е на пат да ја постигне својата цел за проширување на соларниот капацитет бидејќи инсталираната моќност се зголеми од 40 мегавати во 2014 година на повеќе од 8.000 мегавати во 2022 година.
Ова е делумно благодарение на производството во фабриката „Калион“ каде што се инвестирани 475 милиони долари за локално производство и развој.
Тој ја опиша интегрираната фабрика како единствена во светот која се состои од четири фабрики за производство на ингот, ќелии и соларни модули.
Центарот за истражување и развој вработува над 100 истражувачи кои се специјализирани за развој на идни соларни технологии.
До денес, фабриката има произведено околу 3,25 милиони PV-модули од нејзиното основање на 19 август 2020 година.
Фабриката го зголеми капацитетот за проширување на производството од сегашниот капацитет од 1.200 мегавати на 2.000 мегавати годишно.
„БифиПВ 2022“, кој е домаќин на околу 40 експерти од САД, Европа и Азија, ќе трае до 22 октомври.
На последниот ден од програмата на конференцијата, за учесниците е договорена посета на Централата за соларна енергија „Карапинар“, лоцирана во Конија, централна Анадолија.
