ИСТАНБУЛ (АА) – Руската приватна аерокосмичка компанија „Бјуро 1440“ денес го објави лансирањето на своите први 16 нискоорбитални сателити „Расвет“, кои се сметаат како конкуренција на американскиот Старлинк, јавува Анадолу.

Вселенското летало вчера успешно ги постави сателитите во референтната орбита и ќе продолжи кон нивната целна орбита по завршувањето на проверките и активирањето на нивните внатрешни системи, соопшти „Бјуро 1440“ во соопштението објавено на Телеграм.

„Лансирањето на првите сателити кон целната констелација го означува преминот од експерименти кон создавање на комуникациска услуга“, се вели во соопштението, додавајќи дека тимот го завршил патувањето за 1.000 дена.

Следната фаза е распределување на „десетици лансирања и стотици сателити” во руската нискоорбитална констелација за глобална комуникациска услуга, стои во соопштението.

Сателитите Расвет се наменети да обезбедат интернет-пристап на која било точка на Земјата, соопшти компанијата на својата официјална веб-страница. Моментално во орбитата се наоѓаат шест сателити на „Бјуро 1440“, лансирани како дел од две експериментални мисии.

Според плановите на компанијата, комерцијалната услуга е планирано да започне во 2027 година, до кога се планира да има повеќе од 250 сателити во орбитата. До 2035 година, констелацијата би можела да достигне 900 сателити, објави државниот весник „Росијскаја газета“.

„Ние ќе одговориме на Старлинк со проектот Расвет на Бјуро 1440. Исто така, ќе имаме и нискоорбитални широкопојасни комуникации“, изјави извршниот директор на Роскосмос, Дмитриј Баканов, во мај минатата година.