Гугл се согласи да плати 68 милиони долари за спогодба по тужбата за тајно прислушување на корисниците

АНКАРА / ИСТАНБУЛ (АА) – Технолошкиот гигант „Гугл“ се согласи да плати 68 милиони долари за да ја реши тужбата поднесена пред федерален суд во Калифорнија, поради обвинувањата дека неговиот гласовен асистент тајно прислушувал приватни разговори на корисниците, јавува Анадолу.

Тужбата, поднесена на 23 јануари, наведува дека „Гугл асистент“ бил активиран без согласност на корисниците и дека снимал приватни разговори, кои потоа биле испраќани на серверите на компанијата.

Според наводите во тужбата, уредите со оперативен систем „Андроид“ се дизајнирани да се активираат само по препознавање на фрази како „Хеј Гугл“ или „Океј Гугл“, но во одредени случаи асистентот се активирал ненамерно.

Иако „Гугл“ ги обработува гласовните команди преку пренос на снимки до своите сервери, во тужбата се тврди дека ненамерните активирања довеле до собирање и испраќање приватни разговори без знаење на корисниците.

Функцијата на гласовниот асистент е достапна на различни уреди, вклучувајќи „Гугл“ телефони, паметни звучници, лаптопи, таблети и безжични слушалки.

Гугл соопшти дека се согласил да ја плати сумата за да избегне судски спор.

Спогодбата чека одобрување од страна на американската окружна судијка Бет Лабсон Фримен.

Сличен случај беше регистриран и на 3 јануари, кога „Епл“ се согласи да плати 95 милиони долари за да реши колективна тужба поврзана со наводите дека гласовниот асистент „Сири“ прислушувал приватни разговори и ја нарушувал приватноста на корисниците.