„Мајките и татковците треба да станат дигитални родители за да ги заштитат децата на онлајн платформите“

ИСТАНБУЛ (АА) - Експертите велат дека татковците и мајките треба да станат „дигитални родители“ поради времето што нивните деца го поминуваат на онлајн платформите, кое значително се зголеми во текот на пандемијата на коронавирусот, пишува Агенција Анадолија (АА).

Според американската технолошка компанија „OpenVault“, времето поминато на интернет се зголеми за речиси 50 отсто за време на пандемијата, на годишно ниво.

Експертите порачуваат дека семејствата треба да го ограничат и да го планираат времето што децата го поминуваат на интернет.

Д-р Хатиџе Јалчин, менаџер на Центарот за образование на децата при турскиот Универзитет во Каратеј во Коња, рече дека родителите треба да се фокусираат на едукацијата на своите деца за користење на интернетот и дигиталните технологии уште на рана возраст.

За образованието на далечина по пандемијата, родителите се збунети во однос на времето што нивните деца го поминуваат на дигиталните платформи.

„Ако родителите обрнат внимание на некои основни принципи за време на процесот на наставата на далечина, може и да не дојде до посериозните реперкусии од коишто се стравуваше“, изјави таа за Агенција Анадолија (АА).

Рече дека наместо да се наметнуваат строги ограничувања, процесот треба да се управува со „полабави“ правила, а децата треба да се здобијат со дигитални навики и свесност на рана возраст.

„Многу е важно да го планирате времето со децата. Без разлика колку години има детето, тие треба да ја испланираат зачестеноста на користење на социјалните мрежи и играњето онлајн игри“, рече таа.

- Апликации за контрола -

„Зголемувањето на способноста на децата за критичко размислување ќе ја минимизира можноста од можни реперкусии“, вели Јалчин.

„Децата треба да имаат доза на сомнение дека некои содржини на интернет-платформите се неточни. Тие мора да научат да ја доведуваат во прашање содржината и мора да стекнат навика да ги примаат несоодветните информации со сомнеж.“

Таа, исто така, порача дека семејствата треба да бидат внимателни со дигиталната приватност на нивните деца и нагласи дека родителите мора да избегнуваат активности што ја ограничуваат слободата, истовремено заштитувајќи ги децата.

Јалчин додаде дека родителите треба да користат апликации за контрола.

„Со правилно менаџирање, дигиталните технологии им овозможуваат на децата да ги развиваат своите дигитални комуникациски вештини и да ја зголемат својата креативност“, рече таа. „Семејствата треба да поминат квалитетно време со своите деца дури и на интернет за да ги заштитат.“

- Вештини за дигитална писменост -

Д-р Набат Гараханова, експерт за дигитални комуникации, рече дека семејствата треба да научат како да поминуваат квалитетно време со своите деца за да ја подигнат свеста.

„Малите деца можат да бидат заштитени преку режимот за деца на веб-страниците, како што се Google Family и YouTube Kids“, рече таа.

„Мајките и татковците треба да станат дигитални родители за да ги заштитат децата на онлајн платформите“, нагласи таа.

Таа порача дека еден до два часа поминати на интернет се доволни за деца на возраст од две до 10 години, а три часа за оние од 10 до 13 години, под контрола на родителите.

„Родителите треба да ги предупредуваат децата за лошите работи на интернет, исто како и во реалниот свет, а семејствата треба дигитално да се описменат со цел правилно користење на интернет-платформите“, нагласи Гараханова.

„Децата се консултираат со своите пријателчиња наместо со своите семејства за проблемите со кои се соочуваат во дигиталниот свет, затоа дигиталното родителство е многу важно“, заклучи таа.