Заев-Могерини: Нова динамика во процесот на интеграција на Македонија

СКОПЈЕ (АА) - Македонскиот премиер Зоран Заев во рамките на првата официјална посета на Брисел, попладнево се сретна со Доналд Туск, претседател на Европскиот совет, и со високата претставничка за заедничка надворешна и безбедносна политика на ЕУ и потпретседател на ЕК, Федерика Могерини, јавува Anadolu Agency (AA).

Претседателот на Владата, Заев, на средбата со високата претставничка на ЕУ, Могерини, нагласи дека првата официјална дипломатска посета што се реализира во Брисел, заедно со министрите задолжени за реализација на надворешно-политичките приоритети на Македонија, ја покажува одлучноста на Владата на Република Македонија за забрзување на евроинтегративниот процес.

„Во интерес на граѓаните на Македонија е иницијативата за нова динамика во евроинтегративниот процес. Нашата цел е до есен да обезбедиме доволен прогрес во клучните реформски области, со што ќе дадеме доволно аргументи на Европската комисија да презентира нов извештај пред земјите-членки, со обновена препорака за отпочнување на преговорите за членство на Македонија во ЕУ“, рече премиерот Заев.

Претседателот на Владата, Заев, на средбата соопшти дека добрососедските односи и регионалната соработка, засновани на меѓусебно почитување, се силна определба на Владата. На средбата беше нагласено како важно отворањето на поглавјата 23 и 24 од претпристапните преговори.

Високата претставничка за заедничка надворешна и безбедносна политика на ЕУ, Могерини, изрази цврста поддршка на реформските напори на новата Влада и најави дека Македонија има силен сојузник во ЕУ при спроведувањето на реформите. Пораката од високата претставничка од ЕУ, Могерини, е дека ако реформите бидат спроведени, Европската Унија е подготвена да возврати.

По средбата со високата преставничка за надворешна и безбедносна политика, Могерини, премиерот Зоран Заев, придружуван од владината делегација, ќе одржи средба со претседателот на Европскиот совет, Доналд Туск, со еврокомесарот за проширување на ЕУ, Јоханес Хан и со генералниот секретар на НАТО, Јенс Столтенберг.