Handan Kazancı
30 Септември 2021•Ажурирај: 01 Октомври 2021
ИСТАНБУЛ (АА) - Фоторепортерка на Aгенција Анадолија освои трето место на Меѓународниот натпревар за фотографија организиран од страна на невладината организација „Заштита на природата“ (The Nature Conservancy) во категоријата „Луѓето и природата“, јавува Агенција Анадолија (АА).
Шебнем Џошкун беше наградена за нејзината фотографија со наслов „Отпадот од Ковид-19, нова опасност за подводниот свет“ во категоријата „Луѓето и природата“.
На нејзината фотографија се гледа медицински отпад како плива во вода, додека светската рекордерка во нуркање, Турчинката Шахика Ерџумен, го собира ѓубрето во водите на Мраморното Море во Истанбул, Турција.
Повеќе од 100.000 дела поднесени од фотографи од 158 земји беа оценети на натпреварот организиран од страна на „Заштита на природата“, невладина организација со над еден милион членови, која е фокусирана на глобалните еколошки прашања.
Џошкун претходно има освоено разни награди, вклучувајќи ја и наградата на Меѓународниот натпревар „Фотографии на годината“ (POY) - Азија. Триесет и тригодишната фоторепортерка беше прва во категоријата „Природата и животната средина“.
Шебнем Џошкун беше наградена со посебно признание од жирито на Меѓународниот натпревар на фоторепортерите „Андреј Стенин“ и беше финалист во категоријата „Мојата планета“.
Таа е родена во Истанбул, Турција. Својата фотографска кариера ја започна во 2008 година. Магистрира фотографија на Универзитетот „Мармара“ во Истанбул.
