Со традиционални активности, во главниот град на Казахстан, Астана, одбележaн празникот Невруз

АСТАНА (АА) - Жителите на главниот казахстански град Астана денес се собраа за да го прослават празникот Новруз кој го означува доаѓањето на пролетта, јавува Анадолу.

Учесниците изведоа народни танци и се натпреваруваа во традиционални казахстански спортови во специјално подготвени простори што го доловуваа амбиентот на автентичните казахстански села.

Новруз, што во превод значи „нов ден“, претставува прослава на Персиската нова година и го означува првиот ден од пролетта. Се слави околу 20 или 21 март, во зависност од пролетната рамноденица.

Празникот, кој има повеќе од 3.000 години историја, ги има своите корени во зороастризмот, древната религија на Персија (денешен Иран).

Денес, Новруз се слави во многу земји, особено во Централна Азија, Блискиот Исток и делови од регионот на Кавказ.

Фестивалот ја симболизира обновата и повторното раѓање во склад со природните циклуси.

Вообичаено, луѓето ги посетуваат своите семејства и пријатели, разменуваат подароци и уживаат во традиционални јадења.

Еден од најпознатите обичаи е прескокнувањето преку огнови, што симболично означува прочистување од минатите неволји и несреќи.

Обединетите нации во 2010 година го прогласија 21 март за Меѓународен ден на Новруз, признавајќи ја неговата културна важност низ светот.