На AJB DOC прикажан филмот „Сон за слободата“: Приказна за затворениот палестински политички лидер

САРАЕВО (АА) - Во рамките на шестиот Фестивал на документарен филм Ал Џезира Балканс (AJB DOC), денес во Синеплекс се одржа проекција на филмот „Сон за слободата“ на сестрите режисерки Софија и Џорџија Скот, кој ја раскажува приказната за затворениот палестински политички лидер Марван Баргути, јавува Анадолу.

Тесно соработувајќи со семејството на Марван на окупираниот Западен Брег во Палестина, сестрите Скот поминаа повеќе од три години следејќи ја нивната борба со неговиот затворски штрајк со глад.

Со овој филм сестрите Скот претставуваат моќна слика на човекот што еден ден би можел да го води палестинскиот народ и поставуваат прашање: „Дали мирот меѓу Израел и Палестина може да се постигне со вистинските лидери?“

Директорот на фестивалот, Едхем Фочо, истакна дека Марван Баргути, кој се наоѓа во израелски затвор, веќе го нарекуваат „палестинскиот Мандела“.

„Марван Баргути е еден од најпознатите палестински активисти, политичари и борци за слобода. Некој веќе го нарече палестински Мандела. Овој човек е во затвор веќе 21 година и не знаеме дали некогаш ќе излезе. Тој беше обвинет во некаков процес што е фарса. Според сите анкети и по 21 година откако беше уапсен, тој сѐ уште води, а доколку во Палестина се одржат избори, демократски и слободни, тој би ги поразил сите кандидати заедно“, рече Фочо.

Тој потсети дека филмот е во режија на сестрите Софија и Џорџија Скот од Велика Британија.

„Ова е една многу интересна приказна. Филмот не е направен од Арапи или Палестинци, туку од жени, Англичанки, а важно е темата за Палестина да не падне во заборав бидејќи таа трае со децении. Филмот е добар и се надевам дека ќе постигне успех овде, но и на следните фестивали“, рече Фочо.

Марван Баргути (роден на 6 јуни 1959 година) е палестински политички лидер што се наоѓа во израелски затвор. Тој се смета за водач на првата и втората интифада. Израелскиот суд го осуди за наводно убиство, на пет доживотни затворски казни. Тој одби да се брани од обвиненијата против него, тврдејќи дека судењето е незаконско. Баргути, сепак, има големо влијание иако е в затвор.

Фочо истакна и дека е презадоволен од досегашната посета на филмовите што се прикажуваат во рамките на AJB DOC.

„Ова ги надмина сите наши очекувања бидејќи имаме убедливо најголема публика досега. Сите гости се воодушевени. Секогаш го кажувам тоа и повторувам дека ќе бидеме задоволни ако биде на ова ниво и следната година“, изјави директорот на AJB DOC.

Годинашното издание на AJB DOC ѝ носи на публиката 24 документарни филма во четири програмски селекции.

Шестиот филмски фестивал AJB DOC трае до 12 септември, а комплетната програма и сите детали за филмовите што ќе бидат прикажани може да ги најдете на официјалната веб-страница на фестивалот.