Aişe Hümeyra Akgün
23 Април 2024•Ажурирај: 25 Април 2024
ИСТАНБУЛ (АА) - Претседателот на Управниот одбор и генерален директор на Агенција Анадолу, Сердар Караѓоз, им честита на победниците на натпреварот „Istanbul Photo Awards“, што по десетти пат го организира Анадолу.
Караѓоз изјави дека оваа година натпреварувањето го одбележале фотографии кои му кажуваа на светот за воените злосторства извршени од израелската Влада во Газа и рече: „Жирито, составено од важни имиња во меѓународниот свет на фотографијата, ја награди работата на фотографот на Ројтерс, Мухамед Салем, со наслов „Палестинка го гушка мртвото тело на својот внук“ за наградата „Фотографија на годината“. Многу репортери како Салем го пренесуваат на светот геноцидот и злосторствата против човештвото во Газа по цена на своите животи.“
Истакнувајќи дека уште една тема која се истакнува на „Istanbul Photo Awards 2024“ се земјотресите што се случија во Туркије на 6 февруари 2023 година, Караѓоз рече:
„Минатата година како држава доживеавме голем шок со земјотресите на 6 февруари. Годинава на нашиот натпревар се пријавија многу меѓународни фотографи со фотографии кои ги прикажуваат разурнувањата предизвикани од земјотресите и духот на солидарноста и заедништвото што следуваше. Нашето жири му го додели третото место на Адем Алтан од агенцијата Франс-прес во категоријата „Поединечна вест“ со неговите фотографии за земјотресот, трето место на фотографот на „Политикен“, Џејкоб Ербан, во категоријата „Серија вести“, а наградата „млад фотограф“ на Самер ал-Думи на АФП.“
Караѓоз рече дека меѓу победничките фотографи има светски познати имиња како Џон Станмаер, Адам Прети и Мадс Нисен, како и слободни новинари од различни земји, од Индонезија до Италија.
Наведувајќи дека ќе отворат изложби во различни делови на светот и ќе организираат интерактивни и иновативни настани на 10-годишнината од „Istanbul Photo Awards“, Караѓоз им честита на сите фотографи кои освоија награди на натпреварот.
Тој истакна дека на фотографијата на фоторепортерот на „Њујорк тајмс“ Самар Абу Елуф, која ја освои втората награда во категоријата „Поединечна вест“, снимателот на АА, Мухамед ал-Алул, кој во израелските напади ги загуби своите четири деца, е снимен со своето бебе во рацете, и рече: „Во оваа прилика му изразувам сочувство на нашиот брат Мухамед ал-Алул“.
