ЛОНДОН (АА) – Во Лондон вчера се отвори третата изложба „Istanbul Photo Awards 2023“, меѓународен натпревар за избор на најдобри фотографии од светот на медиумите, јавува Анадолу.
Изложбата се одржува во Институтот „Јунус Емре“ во Лондон и ќе биде отворена до 15 декември, а претставува избор од делата на 29 наградени фотографи од натпреварот што го организира Анадолу.
Говорејќи на отворањето, турскиот амбасадор во Лондон, Осман Корај Ерташ, ги дефинираше фотографиите како моќни слики што влијаат врз сиот наш секојдневен живот, и на глобално ниво.
Велејќи дека е многу тешко да се дојде до вистината и дека вистината е „прилично матна“, тој додаде дека полето на информации станало уште едно бојно поле покрај конвенционалните војни.
„Во таква средина ние, како народ, сме горди што имаме моќна, реномирана и доверлива новинска агенција, не само за нашата земја и народ туку и на глобално ниво, која служи за откривање на вистината“, рече Ерташ.
Говорејќи за ситуацијата во Појасот Газа, Ерташ рече дека еден дел од светот ги затворил очите пред она што се случува таму.
Тој, исто така, изрази сочувство за смртта на Монтасер Ал-Саваф, камерман на Анадолу, кој беше убиен во израелските воздушни напади во Газа во петокот.
- Секоја фотографија е доказ -
Говорејќи на настанот, претседателот и извршен директор на Анадолу, Сердар Караѓоз, рече дека новинската агенција Анадолу верува во моќта на фотографијата од нејзиното основање во 1920 година.
Тој истакна дека агенцијата има визуелна архива стара 103 години од околу 13 милиони фотографии на својата платформа Анадолу Имиџис и дека сè уште на светот му нуди во просек по 4.000 фотографии дневно.
Караѓоз потсети дека „Istanbul Photo Awards“, натпревар што се одржува од 2015 година, е најголем показател за влијанието на агенцијата во областа на фотографијата.
„Ја користиме моќта на фотографијата за да ги наградиме и охрабриме фоторепортерите што напорно работат да ја завршат својата работа во различни предизвикувачки и тешки околности“, рече Караѓоз.
Тој изјави дека по девет години „Istanbul Photo Awards“ прераснал во еден од најистакнатите натпревари за новинска фотографија во светот, со 16.000 регистрирани фотографи.
„Наградените фотографии опфаќаат широк спектар на теми од трагедијата во Палестина, случувањата во Нигерија до промените во животната средина поврзани со ресурсите на литиум, напорите за зачувување на животната средина и дивиот свет во Тајланд, Светското првенство во Катар, борбите со бикови во Португалија, мразокршачите на Арктикот и албино населението на африканскиот континент“, истакна Караѓоз.
Тој рече дека изложбата вклучува и претходни наградени фотографии што го прикажуваат „крвавото лице на војната во Палестина“, по израелските напади врз Палестинците.
„Затоа што секоја фотографија е доказ. Како Анадолу, кога лагите се погласни од вистината, сметаме дека е наша должност да ја браниме вистината“, рече Караѓоз.
Тој вети дека Анадолу ќе продолжи да го документира и споделува секој грозоморен чин што ги занемарува меѓународното право и човековите права.
„Меѓународната правда ќе победи порано или подоцна, а кога оние што убиваат бебиња, деца и цивили ќе бидат изведени на суд, овие фотографии ќе бидат најзначајниот доказ“, подвлече тој.
Потсети дека е започнато пријавувањето за 10. издание на „Istanbul Photo Awards“, кое ќе трае до 17 јануари. Тој ги покани сите професионални фотографи да учествуваат на овој престижен натпревар.
- Важноста на документирањето -
Пред присутните се обрати и Мехмет Каракуш, директор на Институтот „Јунус Емре“ во Лондон, кој рече дека се чувствува многу привилегиран што тој културен центар е домаќин на оваа важна изложба.
Потсетувајќи на поговорката за истрајноста на пишаниот збор, Каракуш рече: „Ова не е само личен потсетник за моќта на зборовите туку и показател за важноста да се документира она што се случува околу нас.“
Осврнувајќи се на избраните фотографии на изложбата, Каракуш рече дека доловувањето на таквите моменти го продолжува нивното влијание, создавајќи потенцијал за инспирација, промена и напредок.
Фотографот Алекс Бродвеј, кој ја освои третата награда во категоријата „Единечна фотографија од спортот“ на годинашниот натпревар, за Анадолу изјави дека тоа е „престижен и голем натпревар“.
Наградата за фотографија на годината му припадна на Сергеј Козлов, фотограф од Европската агенција за печат (ЕПА) за неговото дело под наслов „Војна меѓу Украина и Русија“.
Организиран со поддршка на „Никон Туркије“, Турската агенција за соработка и координација (ТИКА) и „Туркиш ерлајнс“, натпреварот додели награди во 10 категории во годинашното издание откако жирито ги избра победниците меѓу 21.000 поднесени фотографии.
Повеќе информации за натпреварот и преглед на победничките фотографии се достапни на https://istanbulphotoawards.com/.
