Aybüke İnal Kamacı
25 Декември 2021•Ажурирај: 27 Декември 2021
АНКАРА (АА) - Употребата на турската антиковид вакцина Турковак како бустер доза по две дози од вакцината Синовак може да го зголеми бројот на антитела четири до пет пати, истакна за Агенција Анадолија (АА) заменик-ректорот на Универзитетот за медицински науки во Истанбул, проф. д-р Кемалетин Ајдин.
Турската вакцина против Ковид-19, Турковак, оваа недела доби одобрение за итна употреба, со што Турција стана една од деветте земји што имаат произведено сопствена вакцина против коронавирусот.
Д-р Ајдин одговараше на прашањата на АА за ефикасноста на вакцината Турковак во производниот погон во индустриската зона во Шанлиурфа, каде што започна производството на вакцината.
Тој потсети дека Турција произведувала вакцини и во османлискиот период и во првите години на Републиката, но дека во 1990-тите години дошло до одреден застој на тоа поле.
Д-р Ајдин рече дека досега во Турција се искористени 123 милиони дози од вакцините против Ковид-19, што претставува сериозен трошок. Истакна дека значителен дел од парите ќе останат во земјата кога ќе почне да се користи домашната, турска вакцина.
Појаснувајќи дека Турковак е инактивна вакцина слична на кинеската вакцина Синовак, Ајдин наведе дека сите фази од нејзината подготовка, експериментите на животни и испитувањата по фази се завршени во Турција во рок од една година.
Тој додаде дека било потребно студијата да се спореди со кинеската вакцина, која е слична, па тоа е и направено.
„Турковак е слична на кинеската вакцина, но има повисоко ниво на ефикасност во однос на кинеската вакцина. Значи, немаме проблеми со доверливоста. Од друга страна, знаеме дека кога ќе се прими како трета или бустер доза, може да го зголеми бројот на антитела четири до пет пати. Турковак може лесно да се користи како бустер доза по Синовак или како прва доза“, истакна проф. д-р Кемалетин Ајдин.
