ОН повикаа на итно воспоставување прекин на огнот поради борбата против коронавирусот

ВАШИНГТОН

Генералниот секретар на ОН, Антонио Гутереш, денес повика да се стави крај на сите конфликти низ светот за да може меѓународната заедница единствено да се фокусира на борбата против коронавирусот, јавува Агенција Анадолија (АА).

„Нашиот свет е соочен со заеднички непријател: Ковид-19. Вирусот не бира националност или етницитет, припадност на фракција или религија. Немилосрдно напаѓа сè“, изјави тој за новинарите за време на виртуелната прес-конференција.

Тој предупреди на пропаста на здравствените системи, на оскудните здравствени капацитети и на загрозениот медицински персонал во земјите зафатени од војна.

„Фуриозноста на вирусот ја илустрира глупоста на војната. Затоа денес повикувам на итен прекин на огнот во сите делови на светот“, додаде тој.

Според американскиот Универзитет „Џонс Хопкинс“, глобалниот број на смртни случаи од Ковид-19 денес надмина 15.000, со речиси 350.000 потврдени случаи низ светот.