Zuhal Demirci
26 Ноември 2021•Ажурирај: 27 Ноември 2021
ЛОНДОН
Поради новата варијанта на коронавирусот позната под името Б.1.1.529, која е забележана во Јужноафриканската Република и Боцвана, Велика Британија стави шест африкански земји на црвената листа за патувања, јавува Агенција Анадолија (АА).
„Агенцијата за здравствена безбедност на Велика Британија (UKHSA) ја истражува новата варијанта. Потребни се повеќе податоци, но сега преземаме мерки“, напиша на социјалните мрежи министерот за здравство на Велика Британија, Саид Јавид.
Наведувајќи дека шест африкански земји се додадени на црвената листа и дека летовите ќе бидат привремено запрени од утре попладне, Јавид изјави дека на листата се ставени Јужноафриканската Република, Лесото, Намибија, Боцвана, Есватини и Зимбабве.
Патниците од овие земји ќе бидат во задолжителен карантин, а Јавид додаде дека научниците се „особено загрижени“ поради новата варијанта на коронавирусот.
Наведувајќи дека новата варијанта би можела да биде позаразна од типот Делта, Јавид изјави дека постоечките вакцини би можеле да бидат помалку ефикасни против новата варијанта на коронавирусот.
„Ова би можело да биде најлошата варијанта која сме ја виделе досега“, порачаа од УКХСА.
Летовите од Јужноафриканската Република, Намибија, Лесота, Боцвана, Есватини и Зимбабве ќе бидат запрени утре од 12 часот, а патниците кои од споменатите земји ќе дојдат во Велика Британија по 16 часот в недела, исто така ќе мораат во карантин.
Во Велика Британија досега не е забележан ниту еден случај на новата варијанта на Ковид-19.
Во Јужноафриканската Република и Боцвана досега е забележана новата варијанта на Ковид-19, под називот B.1.1.529, со голем број мутации. Овој вирус е пронајден кај едно лице кое патувало од Јужноафриканската Република во Хонгконг.
Наведено е дека варијантата B.1.1.529, која е опишана како супер варијанта, има 32 мутации.
Според зборовите на експертите, сѐ уште не е познато дали сегашните вакцини се ефикасни против оваа варијанта.
