АНКАРА (АА) - Како резултат на растот од бројот на случаи со Ковид-19 низ Европската Унија (ЕУ), земјите усвојуваат нови мерки и ги заоструваат постојните ограничувања за спречување на ширењето, јавува Агенција Анадолија (АА).
И покрај интензивните програми за вакцинирање, зголемувањето на бројот на случаи на коронавирусот принуди неколку земји на ЕУ да преземат нови мерки против многу преносливата делта-варијанта.
- Германија предупредува на зголемување на случаите -
На 14 јули, Германија регистрира 1.548 случаи на вирусот на дневно ниво, кои на 21 јули се искачија на 2.203, достигнувајќи го највисокото ниво во месецот. Властите велат дека зголемувањето се должи на делта-варијантата, што за првпат е откриена во Индија.
Агенцијата за контрола на болести на земјата, Институтот „Роберт Кох“, објави дека на делта-сојот сега припаѓаат околу 84 отсто од новите случаи на Ковид-19 во Германија.
Министерот за здравство, Јенс Спан, исто така предупреди дека е можно сериозно зголемување на случаите на Ковид-19 во месеците што доаѓаат.
Вкупно 50,4 милиони луѓе во Германија имаат примено прва доза од вакцините, додека 40,36 милиони луѓе се вакцинирани со втора доза. Првата доза на вакцината е администрирана на 60,6 отсто на населението, додека втората доза на 48,5 отсто.
- Белгија бележи пораст на случаите во текот на јули -
Бидејќи Белгија ги олабави мерките за пандемијата во мај и јуни, бројот на случаи започна да се зголемува овој месец.
Научниот институт за јавно здравје објави дека бројот на нови случаи се зголемил за 19 отсто во неделата од 15 до 21 јули, кога се регистрирани 1.407 случаи.
Од 13 август, Владата ќе започне да издава карти за Ковид-безбедни информации што ќе покажуваат дали некое лице е целосно вакцинирано, дали ја има прележано болеста или неодамна имало негативен тест на вирусот. Белгијците ќе можат да присуствуваат на социјални настани со оваа картичка.
Според податоците на Европскиот центар за превенција и контрола на болести (ECDC), 82,7 отсто од возрасната популација во Белгија ја има примено првата доза на вакцина, со што е на трето место во ЕУ според бројот на аплицирани дози, со 62,7 отсто од населението целосно вакцинирано.
- Грција воведува повеќе рестрикции поради пандемијата -
Поради неодамнешниот бран случаи, Грција започна да спроведува многу нови мерки, особено обврската за вакцинирање.
Со отворањето на туристичката сезона во Грција, рестриктивните мерки беа заострени во некои региони поради зголемувањето на бројот на случаи на егејските острови. На островот Миконос, едно од важните летувалишта во земјата, беше воведен полициски час во текот на ноќта.
Според грчкото Министерство за здравство, во последните 24 часа регистрирани се 2.854 новозаразени и седум смртни случаи, додека околу 44 отсто од популацијата го завршиле процесот на вакцинација.
- Велика Британија ги укинува ограничувањата, во услови кога ЕУ ги заострува мерките -
И покрај сличниот неодамнешен раст на случаите на Ковид-19 во Велика Британија, последните рестриктивни мерки за вирусот воведени во рамките на планот од четири фази беа укинати на 19 јули.
Премиерот Борис Џонсон ја укина мерката за физичка дистанца од еден метар и обврската за носење маски.
Сепак, носењето маска сè уште се препорачува, особено во преполн затворен простор како јавниот превоз. Со укинувањето на ограничувањата, исто така беше укинато и ограничувањето за бројот на лица за собири во затворени простории и на отворено, вклучително и на концерти, кина и театри, а се отворија и ноќните клубови и баровите.
Експертите се загрижени дека делта-сојот ќе предизвика трет бран сега кога рестриктивните мерки се укинати, бидејќи на него отпаѓаат 99 отсто од новите случаи.
Бројот на заразени во последните 24 часа во земјата се искачи на 36.389, додека 64 лица починаа од причини поврзани со коронавирусот.
Од почетокот на програмата за вакцинација во Велика Британија на 8 декември 2020 година, досега првата доза вакцина ја имаат примено 46 милиони луѓе, додека 36 милиони се целосно вакцинирани.
- Франција бележи пораст на случаите -
Со порастот на бројот на заразени како резултат на делта-сојот, француската Влада донесе одлука вакцинацијата да биде задолжителна за вработените во болниците и старечките домови, и да се прошири постоечката здравствена легитимација.
Поради барањето за вакцинација и легитимацијата за Ковид-19, се протестираше од страна на илјадници луѓе во повеќе градови.
Според француската Агенција за јавно здравје, во последните 24 часа евидентирани се 21.493 заразени лица, а 26 починале од последици од вирусот.
Во текот на последните седум дена, стапката на позитивни тестови на Ковид-19 се зголеми на 3,7 отсто.
Според податоците на француското Министерство за здравство, бројот на луѓе што имаат примено прва доза од вакцините против Ковид-19 од 27 декември 2020 година изнесува 39 милиони, а 32 милиони имаат примено втора или трета доза.
- Италијанско првенство ЕУРО 2020 -
Италијанскиот национален институт за здравство соопшти дека делта-сојот продолжува да се шири во земјата, и дека ги напаѓа и помладите.
Прославите по победата на Италија на ЕУРО 2020 на 11 јули, исто така, придонесоа за зголемување на бројот на случаи.
Владата, предводена од премиерот Марио Драги, ќе воведе документ за зелена транзиција, кој има за цел подобра слика за вакцинацијата, особено при општествените активности, од 6 август, во обид да спречи уште едно запирање на економските активности во земјата.
Од почетокот на вакцинацијата во Италија на 27 декември 2020 година, администрирани се 64 милиони дози вакцини.
