Ebu Bekir Aşkın
17 Февруари 2022•Ажурирај: 18 Февруари 2022
АЛЖИР (АА) – Соочувајќи се со потешкотии во Франција поради неговата култура и религија, францускиот анестезиолог со алжирско потекло, д-р Зеки Тувати, одлучи да се пресели во Турција и таму да продолжи да ја извршува својата професија, јавува Агенција Анадолија (АА).
Тувати, кој живее во Париз речиси 20 години, рече дека решил од Франција да се пресели во Турција.
„Многу е тешко да се практикуваат муслиманските традиции во Франција. Религијата е многу важна во мојот живот. Затоа решив да ја напуштам Франција“, изјави Тувати за АА.
„Размислував која земја да ја изберам. Најважно е да биде муслиманска земја. Освен тоа, сакав добра економија и добар живот. Затоа ја избрав Турција.“
– Животот во Турција –
Велејќи дека ја посетувал Турција пред да ја донесе одлуката за преселување таму, Тувати рече: „Многу ја сакам Турција, таа е муслиманска земја и ги има сите карактеристики што ги барам.“
Во врска со преселувањето заедно со своето семејство во градот Истанбул, францускиот анестезиолог рече дека ги запишал своите деца во турски училишта и дека со нетрпение очекува да работи како лекар во Истанбул откако ќе ја нострифицира дипломата.
„Моите деца сега зборуваат турски, но не заборавија арапски“, рече тој.
„Ние се приспособуваме на турската култура, но не ги забораваме јазикот и културата на Алжир, која е наша култура.“
„Доколку моите деца пораснат во Франција, би го заборавиле арапскиот јазик. Тие би зборувале само француски, што е премногу лошо за нас“, додаде тој.
Зборувајќи за својата професионална кариера во Турција, Тувати рече дека планира прво да положи некои испити за нострификација на дипломата.
Д-р Тувати, кој зборува англиски, француски и арапски, рече дека планира да ги лекува странските пациенти кои доаѓаат во Турција во иднина и да ги информира за здравствениот систем во земјата.
– Турскиот здравствен систем –
Во врска со турскиот здравствен систем, д-р Тувати, кој моментално работи како лекар во болница во Франција 15 дена месечно, рече: „Здравствениот систем во Турција не се разликува од оној во Франција.“
„Многу ми се допаѓаат турските болници. Имаат многу развиена опрема“, рече тој.
„За мене тоа не е многу различно [од Европа], процедурите се исти.“
Велејќи дека сам почнал да учи турски јазик, Тувати додаде: „Учев нов турски збор секое утро додека не почнав сам да составувам реченици.“
„Зборувам турски со Турците кои доаѓаат во мојата болница во Франција. Тие се многу изненадени кога ме слушаат како зборувам турски.“
