ИСТАНБУЛ (АА) – Семејството Апак од Силиври, Истанбул, својата куќа ја претвори во вистинско засолниште за различни видови животни, давајќи им дом и грижа на оние што се напуштени или повредени, јавува Анадолу.

Семејството, кое живее во куќа со голем двор, базен и вештачко езерце, секојдневно го дели просторот со овие животни, вклучувајќи ги во своите активности и рутина.

Животните имаат слободен пристап во домот, а најмногу уживаат во играта во езерцето и заедничките оброци.

Ѓизем Апак, нејзиниот сопруг Онур и сестра ѝ Излем пред шест години ја започнале оваа мисија за спасување животни, кога го згрижиле малото магаре Туркан, кое по смртта на мајката со денови останало гладно и жедно.

Потоа ја згрижиле и кравата Бамби, која успеале да ја спасат од кланица.

Со текот на времето семејството згрижило и други животни – врана што не можела да лета, седум зајаци, три желки, разни птици и десетици кучиња.

Минатата недела семејството згрижило и петел, кој уште првата ноќ спиел покрај нивните ќерки Пера и Парла.

Ѓизем за Анадолу вели дека уште како дете се интересирала за животни.

„Кога бевме мали, ни купуваа големи палта, велејќи дека брзо растеме. Дури и тогаш, во зима седев надвор на снег, ги ставав мачките под палтото и земав куче со мене. Моето семејство ми даваше џепарлак, а јас купував млеко и салама за животните. Им бев многу посветена кон животните.“

- Животните се дел од секојдневниот живот на семејството -

Туркан и Бамби сакаат да влегуваат во куќата, а враната Ѓакгук секогаш чука на прозорецот за време на појадокот за да добие храна.

Секое животно има свој ритам и рутина, а меѓусебниот однос и хиерархија меѓу нив се воспоставиле природно.

Ѓизем вели дека магарето Туркан е исклучително интелигентно – со устата успева да отвори врати, да вклучи светилка и да отвори вреќи со храна, а кучето Бадем вешто нурка во езерцето.

Враната Ѓакгук, пак, често е лидер меѓу животните и постојано ја следи својата сопственичка.

- Живот без стрес -

Семејството нагласува дека овој начин на живот им донел поголема поврзаност, љубов и смиреност.

Нивните деца растат во контакт со животните, секојдневно пливаат со нив во базенот и езерцето, ги хранат и негуваат.

Ѓизем, која дел од бременоста ја поминала во друштво на спасените животни, вели дека тие станале составен дел од семејството.

„Чувството да живееш со овие животни е како да ти го продолжуваат животниот век. Благодарение на нив, станавме семејство со помалку стрес и повеќе се поврзавме. Во нив (животните) го гледате значењето на безусловната љубов“, вели таа.

Апак најавува дека во иднина сакаат да отворат поголема фарма-засолниште за уште повеќе видови животни на кои им е потребна грижа.

Таа потенцира дека секое животно заслужува љубов и шанса за нов живот, а нивната приказна е доказ дека различни видови животни можат да живеат заедно во хармонија.