НАЈРОБИ (АА) – Кениската климатска активистка Труфена Мутхони постави нов светски рекорд откако непрекинато прегрнуваше дрво цели 72 часа во округот Њери, завршувајќи го подвигот денес, како дел од кампањата за промовирање на заштитата на автохтоните дрвја и менталната благосостојба, јавува Анадолу.

Дваесет и двегодишната активистка го започна предизвикот во понеделникот, со цел да го надмине својот претходен рекорд од 48 часа.

Настанот беше следен од локалните власти и здруженија, а жителите постојано пристигнуваа за да сведочат на обидот додека Мутхони го прегрнуваше дрвото, дури и за време на дожд.

Нејзиниот подвиг брзо привлече национално внимание, при што еколошките организации го пофалија симболизмот на ваквиот предизвик за издржливост како начин за подигнување на свеста за загрозените автохтони видови дрвја во Кенија.

Во изјавата за новинарите по завршувањето на настанот, Мутхони рече дека сака младите Кенијци да видат дека заштитата на природата и менталното здравје се меѓусебно поврзани.

„Ова го направив за да покажам дека природата може да нè држи кога животот станува тежок, а заштитата на нашите дрвја е дел од заштитата на нашата сопствена благосостојба“, истакна таа.

Еколошките службеници од округот Њери, кои беа присутни денес, изјавија дека нејзината акција го зголемила фокусот на напорите за обновување на автохтоните дрвја во Централна Кенија – регион што се соочува со ерозија на почвата, променливи врнежи и притисок врз природните шуми.