Ekipa
18 Февруари 2022•Ажурирај: 21 Февруари 2022
ПАРИЗ (АА) ‒ Неодамнешното истражување спроведено во Франција покажа дека оние со муслимански имиња и презимиња кои аплицираат на програмите за додипломските студии се повеќе дискриминирани во однос на оние со етнички француски имиња, пренесува Агенција Анадолија (АА).
Истражувачите од Агенцијата за набљудување на дискриминацијата и еднаквоста во високото образование (ONDES) и Универзитетот „Густав Ајфел“ испратија повеќе од 1.800 и-мејлови во март 2021 година до директорите за образование на 607 програми за додипломските студии од 19 универзитети за да ја тестираат дискриминацијата врз луѓето со попреченост и оние со странско потекло.
Директорите со кои истражувачите контактирале, тврделе дека ја прифаќаат различноста кај нивните ученици и не им даваат приоритет на оние кои доаѓаат со европско потекло, но истражувачите го откриле спротивното.
За оние со муслиманско име, истражувањето откри дека имаат 12,3 проценти помала веројатност да добијат одговор на и-мејл испратен до секоја од нивните програми за додипломски студии. Оваа стапка е 33,3 проценти во областа на правото, 21,1 проценти во областа на науката, технологијата и здравството и 7,3 во областа на јазикот, литературата, уметноста и општествените науки.
Истражувачите анонимно ги интервјуирале истите директори три месеци по завршувањето на истражувањето, во име на Министерството за високо образование „за потешкотиите со кои се соочиле во процесот на примањето студенти“, откривајќи го потоа двојниот стандард кога станува збор за желбата на директорите да ја прифатат различноста.
Не беше пронајдена дискриминација кај студентите кои изјавија дека се со физичка попреченост.
Правата на муслиманите беа предмет на интензивна дебата во текот на изминатата деценија во Франција, откако во земјата се случија екстремистички напади како што беа нападите врз редакцијата на сатиричниот магазин „Шарли Ебдо“ (Charlie Hebdo) во јануари 2015 година во кои загинаа 12 луѓе, по што следуваа нападите во Батаклан во ноември истата година кога во една вечер загинаа 130 луѓе. Наставникот Семјуел Пети беше обезглавен во средината на октомври 2020 пред средното училиште северно од Париз во кое тој предаваше. Тринаесет дена подоцна, тројца лица починаа од рацете на човек со нож во „Нотр Дам“ во Ница, а еден од нив, исто така беше обезглавен.
Сите беа спроведени од страна на наводни припадници на терористичката организација ДЕАШ.
И покрај тоа што поделбата на Црквата и државата е основачки принцип на француската демократија која датира од Француската револуција, Владата има посебен пристап кон нејзиното придржување кон секуларната идеологија, па дури и термин за неа: лаицит. Донекаде перспективата има за цел да ги зајакне вистинските демократски принципи на еднаквоста, толеранцијата и правичноста, додека државата одржува неутрален став и не ги признава верските разлики помеѓу граѓаните.
