ЛОНДОН (АА) – Во едно мало кафуле во северен Лондон палестински брачен пар претвора домашно направена чоколада во извор на надеж за Газа, продолжувајќи ја својата мисија за солидарност со поддршка од локалната заедница и покрај притисоците од одредени кругови, јавува Анадолу.

За Фатен Сехваил и нејзиниот сопруг Махмуд Исмаил нивното кафуле во Ислингтон е многу повеќе од место за кафе и десерти – тоа е центар за поддршка и симбол на човечноста кон семејствата во Газа, каде што Сехвеил го минала детството.

Откако започнаа израелските напади врз Газа во октомври 2023 година, таа изгубила повеќе од 30 блиски роднини во родниот град Беит Ханун, кој бил целосно разурнат.

Поттикната од болка, но и од желба да помогне, Сехваил нашла креативен начин да обезбеди помош – започнала да прави чоколада под мотото „Домашна чоколада за Газа“.

Четириесет и петгодишната Сехваил, која никогаш претходно не се занимавала со правење чоколади, во декември минатата година одлучила да започне со мали количини, користејќи белгиска чоколада и неколку калапи, со поддршка од сопругот.

Нејзините први чоколади брзо привлекле внимание, а потоа добила покана да постави штанд на собир во Ислингтон, каде што зборувала за страдањата на луѓето во Газа.

Тогаш добила поддршка од многумина, меѓу кои и британскиот пратеник Џереми Корбин, кој ги повикал присутните да ја купат нејзината чоколада.

Таа рече дека ја замолиле да се обрати пред толпата: „Не се подготвив за говор. Отидов таму само за да ја продадам чоколадата. Го зедов микрофонот и почнав да зборувам за тоа што се случува во Газа и дека живеат во многу тешки услови.“

„Кога ги погледнав луѓето на собирот, видов дека повеќето почнаа да плачат. И откако го завршив говорот... (Независниот пратеник) Џереми Корбин ги замоли сите да ја купат мојата чоколада“, додаде Сехваил.

Оттогаш, рече таа, почнале да доаѓаат многу муштерии за да купат чоколада.

„Во овој период, секој месец, има национален марш и продавам дел од моите чоколади, како и некои други предмети за да соберам пари. И сите пари им ги праќам на пријателот и семејството во Газа за да ги поддржам.“

- Обиди да се принудат да ги отстранат палестинските знамиња и налепници -

Нејзиниот сопруг Махмуд Исмаил ја изрази својата цврста поддршка за напорите на Сехваил, така што во кафулето продава разни производи со палестинска тематика - вклучително знамиња, честитки и торби, а приходите се праќаат директно во Газа.

Тој спомена дека Сехваил прави сè што може за да собере средства за поддршка така што прави чоколади, присуствува на настани и подготвува храна и оброци за луѓето, сè за да им помогне на семејството и роднините во Газа.

„Откако го започна својот проект со правење чоколада за Газа добивме многу позитивна поддршка од сите луѓе тука“, рече 60-годишниот Исмаил.

Брачниот пар, исто така, организира настани во кафулето, на кои се нудат оброци, вклучително и локални јадења од Палестина.

Исмаил рече дека муштериите не доаѓаат само за чоколада или кафе - тие купуваат производи како начин да ја изразат својата солидарност со Газа.

Тешките моменти, вели Исмаил, вклучуваат притисок од надворешни лица што се спротивставуваат на нивните напори и кампања.

Тој додаде дека откако биле поднесени жалби, Советот на Ислингтон се обидел да ги принуди да ги отстранат палестинските знамиња и налепници од кафулето.

„Дојдоа и ми рекоа да извадам сè“, рече тој, додавајќи: „Јас одбив.“

Тој додаде дека палестинското знаме не е само симбол за Палестина туку станало и „универзален симбол“ за луѓето што го поддржуваат човештвото.

„Горд сум на тоа (знамето) и никогаш нема да го отстранам“, рече Исмаил, покажувајќи снимка од безбедносните камери од моментот кога службениците од Советот пристигнале во кафулето.

Владата на Велика Британија се соочува со долгогодишни критики за вршење притисок врз пропалестинскиот активизам, без разлика дали преку полициски акции или законски измени.

Неодамна групата „Палестинска акција“ беше забранета и прогласена за терористичка група, предизвикувајќи домашни и меѓународни реакции.

Голем број пропалестински активисти се соочија и со правни постапки во Велика Британија од октомври 2023 година.

И покрај овие пречки, Сехваил и Исмаил велат дека силната поддршка од заедницата им дава сила.

Исмаил, исто така, рече дека често добиваат негативни критики на интернет од поединци што никогаш не го посетиле кафулето, што тој го опишува како кампања од страна на произраелски поддржувачи.

Тој се потсети на инцидентот кога еден човек дошол во кафулето и се обидел насилно да ги отстрани налепниците со палестинска тематика.

И покрај притисокот и поплаките, Исмаил останува решен да продолжи, нагласувајќи дека ова е прашање на човечност.