Mücahithan Avcıoğlu
11 Март 2026•Ажурирај: 12 Март 2026
ИСТАНБУЛ (AA) – Цените на нафтата продолжија да растат денес и покрај сè погласните повици за ослободување на стратегиските резерви на сурова нафта и изјавите на американскиот претседател Доналд Трамп дека војната со Иран можеби се приближува кон својот крај, јавува Анадолу.
Меѓународните фјучерси за суровата нафта од типот Брент се тргуваа за над 90 долари за барел, проширувајќи го растот во услови на постојана нестабилност на пазарот предизвикана од конфликтот на Блискиот Исток, откако се повлекоа на околу 80 долари, а потоа пораснаа за 12,5 %.
Американската лесна сурова нафта (WTI) исто така забележа раст и се задржа на околу 88 долари за барел, додека трговците ги балансираат ризиците од потенцијални прекини во снабдувањето со сигналите дека воената конфронтација би можела наскоро да се смири.
Трамп во понеделникот изјави за „Си-би-ес њуз“ дека војната со Иран е „во голем дел завршена, практично“, што сугерира дека конфликтот би можел наскоро да заврши и делумно ги смири стравувањата од долготрајни нарушувања на енергетските текови низ Ормускиот Теснец.
Сепак, и покрај овие изјави, цените на нафтата останаа високи бидејќи пазарите продолжуваат да ја земаат в предвид геополитичката неизвесност и ризиците поврзани со регионалните поморски рути.
Во меѓувреме, владините претставници и агенции за енергетика разговараат за можноста за ослободување на итни резерви на сурова нафта со цел стабилизирање на пазарите.
Меѓународната агенција за енергија предложи потенцијално ослободување на околу 300 до 400 милиони барели од стратегиските нафтени резерви доколку дојде до посериозни нарушувања во снабдувањето, јави „Блумберг“.
Овие разговори се одвиваат во услови кога конфликтот значително ги потресе глобалните енергетски пазари, покачувајќи ги цените на нафтата на почетокот на оваа недела, што претставува највисоко ниво на покачување досега и предизвикувајќи силни осцилации и на пазарите на суровини и на финансиските пазари.
