Фолксваген го запре производството во фабриката во кинескиот град Ченгду поради зголемување на случаите на Ковид-19

БЕРЛИН (AA) - Германскиот производител на автомобили Фолксваген го запре производството во својата фабрика во кинескиот град Ченгду поради зголемувањето на случаите на Ковид-19 во Кина и воведените ограничувања, пренесува Агенција Анадолија (АА).

Како што информираат германските медиуми, производството во фабриката на Фолксваген во Ченгду е привремено запрено.

Поради пандемијата запрени се и две производни ленти во фабриката на Фолксваген во градот Чангчуен.

Производството ќе продолжи во други фабрики на Фолксваген во Кина.

Германските медиуми тврдат дека е можно да дојде до краткорочни измени во начинот на работа на фабриките на Фолксваген во Кина поради најновата ситуација во врска со пандемијата на Ковид-19.

Кина денес објави рекордна стапка од 40.052 случаи на заразени со Ковид-19 во земјата, по викендот што го одбележаа протести низ земјата поради рестриктивните ограничувања.