Американскиот претседател Доналд Трамп изјави дека постои можност војната меѓу Русија и Украина да заврши доколку европските земји извршат економски притисок врз Кина, известува Анадолу.

Во интервју за „Фокс њуз“ последниот ден од неговата посета на Велика Британија, Трамп даде оценка за најновите случувања во врска со војната меѓу Русија и Украина.

Истакнувајќи дека Кина е земјата што увезува најмногу нафта од Русија, Трамп рече дека „војната можеби би завршила“ доколку Европа „воведе санкции или царини кон Кина“.

Повторувајќи го својот апел до европските земји да престанат да купуваат нафта од Русија, Трамп рече:

„Ако сакате да победите, мора да престанете да купувате нафта од Русија“.

Наведувајќи дека нема да коментира дали нарушувањето на воздушниот простор на Полска, членка на НАТО, од страна на Русија со воени беспилотни летала (БЛН) на 10 септември е „грешка“, Трамп нагласи дека овој инцидент не требало да се случи.

На 15 септември Трамп ги повика европските земји да „престанат да купуваат нафта од Русија“, велејќи:

„Санкциите што ги воведоа (кон Русија) не се доволно строги. Јас сум подготвен да воведам санкции, но тие ќе бидат принудени да ги заострат своите санкции пропорционално на она што јас го правам“.

Покрај тоа, Трамп го наведе купувањето руска нафта од страна на Њу Делхи како оправдување за дополнителните тарифи што одлучил да ги воведе кон Индија во август.