ВАШИНГТОН (АА) - Американскиот претседател Доналд Трамп вчера издаде нова извршна наредба со која ги менува царините што неговата администрација ги воведе летово за широк спектар бразилски производи, укинувајќи дополнителни давачки за одреден земјоделски увоз, јавува Анадолу.

Наредбата претставува ревизија на Извршната наредба 14323 потпишана во јули, со која Трамп прогласи национална вонредна состојба поради, како што ги нарече, „политиките, практиките и дејствата на Владата на Бразил“ што, според него, претставуваат закана за националната безбедност и економските интереси на САД. Со таа јулска одлука беше воведена царина по вредност од 40% на голем број увоз од Бразил.

„Постигнат е почетен напредок во преговорите со Владата на Бразил“, се наведува во новата наредба, повикувајќи се на телефонскиот разговор минатиот месец меѓу Трамп и неговиот бразилски колега Луиз Инасио Лула да Силва, кои се согласија да ги отворат преговорите за решавање на трговскиот спор.

Ажурираниот анекс на јулската наредба, кој ќе се применува ретроактивно од 13 ноември, отстранува одредени земјоделски категории од дополнителната стапка на давачки.

Според директивата, државниот секретар Марко Рубио ќе продолжи да ги следи развојните процеси и ќе го советува претседателот доколку бидат потребни нови мерки.