Лондон заинтересиран за партнерство со Турција во бизнис-секторот

ЛОНДОН (АА) - Лорд-градоначалникот на Лондон, Чарлс Бауман, изјави дека Лондон сака да биде партнер со Турција во развојот на бизнис-секторот, пишува Anadolu Agency (AA).

Во интервју за АА пред неговата посета на Турција, Бауман изјави дека тоа претставува главна цел на неговата посета.

„Велика Британија и Турција имаат силни трговски врски и во 2017 година достигнаа ниво на трговска размена од 20 милијарди долари“, изјави Бауман.

Тој рече дека е возбуден за посетата на Турција оваа недела и дека има пет цели за време на посетата.

Тие вклучуваат обезбедување сигурност дека во контекст на Брегзит, финансиските и професионалните услуги на Лондон и Велика Британија ќе останат исклучителни, и зајакнување на силните врски помеѓу Турција и Велика Британија изградени во текот на годините.

Бауман изјави дека останатите цели се да се развијат и искористат билатералните можности во трговијата, инвестирањето и бизнисот, иновации во финансиските и професионалните услуги и ангажирање на турските заедници и бизниси поврзани со Бизнис-довербата - Програма која ја води лорд-градоначалникот на Лондон.

Нагласувајќи дека како лорд-градоначалник на Лондон е главен гласноговорник на Обединетото Кралство за и во име на финансиските и професионалните услуги на Обединетото Кралство, Бауман рече дека тие услуги вработуваат 2,3 милиони луѓе низ целата земја.

„Секторот е дом на околу 250 банки само во Лондон, повеќе од кој било друг меѓународен финансиски центар. Лондон е национален, европски и меѓународен скапоцен камен“, рече тој.

Бауман истакна дека посетил 30 земји и дека е многу возбуден за посетата на Турција оваа недела.

- Силно партнерство -

Бауман рече дека во посета на Истанбул пристигнува како шеф на бизнис-делегацијата, додавајќи дека билатералната трговска цел меѓу двете земји во 2017 година беше поставена на 20 милијарди долари.

„Среќен сум што можам да кажам дека тоа е постигнато и дека е постигнато уште повеќе“, изјави тој.

„Ние имаме силна врска со Турција изградена во текот на изминатите години. И оваа посета на Турција не е случајна. Закажана е порано и навистина со нетрпение очекувам развивање и искористување на овие можности за понатамошен раст, што веќе претставува силно партнерство.“

Бауман рече дека е подготвен да разговара за бизнис-односите помеѓу Велика Британија и Турција со високите бизнис-претставници и претставниците на Владата во Истанбул, особено фокусирајќи се на тоа како Велика Британија и Турција можат да го поттикнат заедничкиот развој.

„Од особен интерес се областите на инфаструктурата и исламскиот систем на финансирање, финансиската технологија и управувањето со средствата“, додаде тој.