ЕУ: Хрватска е подготвена во 2023 година да го усвои еврото

БЕЛГРАД (АА) - Европската комисија објави дека Хрватска ги исполнила сите услови за усвојување на заедничката валута, еврото, на почетокот на 2023 година, јавува Агенција Анадолија (АА).

Комисијата објави извештај кој ги одредува нивоата на подготвеност на земјите членки на Европската Унија кои не го користат еврото за влез во еврозоната.

Во извештајот се наведува дека бројот на земји членки на еврозоната ќе се зголеми на 20 откако Хрватска ќе го усвои еврото.

Се додава дека Хрватска ги исполнува критериумите во областите како што се стабилноста на цените, јавните финансии, девизниот курс и долгорочните каматни стапки при транзицијата кон еврото.

Конечната одлука за транзицијата на земјата кон еврото се очекува да ја донесе Европскиот совет во јули откако Европскиот парламент и Европската централна банка ќе го дадат нивното мислење.

Првичниот извештај го оцени прогресот на Бугарија, Чешката Република, Хрватска, Унгарија, Полска, Романија и Шведска во процесот на пристапување кон еврозоната.

Хрватска во мај го одобри законот кој го поплочи патот за воведување на еврото како валута.

Хрватска, која влезе во ЕУ во 2013 година, треба да ја замени хрватската куна со еврото на 1 јануари 2023 година.

Германија, Франција, Италија, Шпанија, Холандија, Австрија, Белгија, Финска, Ирска, Луксембург и Португалија одлучија еврото да почне да се користи од јануари 1999 година.

Во 2002 година, банкнотите и монетите на еврото беа воведени во земјите на ЕУ кои ја прифатија валутата.

На почетокот еврото почнаа да го користат 11 земји. Со транзицијата на Грција во 2001 година, Словенија во 2007 година, администрацијата на кипарските Грци и Малта во 2008 година, Словачка во 2009 година, Естонија во 2011 година, Латвија во 2014 година и Литванија во 2015 година, еврозоната имаше вкупно 19 членки.

Еврото е втората најкористена резервна валута во светот по американскиот долар.