ЕК со повисоки цени на житото од Русија и Белорусија сака да го отежне руското финансирање на војната во Украина

БРИСЕЛ (АА) - Европската Унија (ЕУ) сака да го отежне руското финансирање на војната во Украина со повисоки царини на житото од Русија и Белорусија, известува Анадолу.

Имено, Европската комисија предлага зголемување на царините на увозот на жито, маслодајни семиња и производи од жито од Русија и Белорусија за да се спречи дестабилизација на пазарот на ЕУ и извоз на жито кое Русија илегално го стекна на територијата на Украина.

Меѓу останатото, Брисел предлага зголемување на царината за житото - пченица, 'рж, јачмен, овес и пченка и маслодајни семиња и овошје, како и на одредени производи од жито. Освен тоа, предлага и зголемување на царината и за растителни материјали за ткаење, масти и масла од животинско и растително потекло и подготвена добиточна храна.

Зависно од производот, се предлага зголемување на 95 евра по тон или зголемување на ad valorem царината на 50 % од вредноста на стоката.

Според Европската комисија, со тоа царините би биле доволно високи да го обесхрабрат увозот во Европската Унија. Освен тоа, Русија и Белорусија не би имале пристап до европските квоти на Светската трговска организација (ВТО), кои предвидуваат поволен царински третман за одредени производи.

Со овие мерки Европската комисија би ја спречила дестабилизацијата на пазарот на ЕУ што би се случила со понатамошни големи пренасочувања на руските производи на тој пазар. Во исто времено, тоа би го отежнало извозот на житото одгледано на украинска територија до кое Русија нелегално дојде.

Предложените тарифи би обезбедиле незаконските активности повеќе да не бидат исплатливи. Исто така, се сака да се спречи Москва да профитира од извозот на жито во ЕУ и со тоа да ја финансира својата воена агресија во Украина.

Минатата година Русија извезе жито во вредност од 1,3 милијарди евра.

„Предлагаме воведување царина за да го ограничиме сѐ поголемиот ризик за нашиот пазар и земјоделците. Тие ќе го намалат руското искористување на ЕУ за придобивките на нејзината воена машинерија. Освен тоа, остануваме посветени на обезбедување сигурност на храната низ целиот свет, особено во развиените земји“, рече Урсула фон дер Лајен, претседателката на Европската комисија, претставувајќи го предлогот.

Според Комисијата, извозот во трети земји не би требало да биде под влијание на царината. Предлогот ќе го разгледа Советот на ЕУ, кој ги вклучува земјите членки. Откако ќе биде прифатен, зголемените тарифи веднаш ќе стапат во сила.

Досега ЕУ експлицитно избегнуваше да воведе санкции за руските земјоделски производи за да не го наруши глобалното снабдување. Комисијата соопшти дека со царините и понатаму ќе биде дозволен транзит на жито низ земјите членки во трети земји, како и финансирање, осигурување, складирање и транспорт на такви пратки.

Според трговците, руската и белоруската испорака во ЕУ е мала, особено во споредба со оние од Украина, и наметнувањето царина главно е симболично.