Associated Press
14 Јули 2022•Ажурирај: 16 Јули 2022
БРИСЕЛ (АА) - Се очекува во догледна иднина руската војна во Украина да предизвика голема штета на економскиот развој на Европската Унија (ЕУ), помал економски раст и рекордно висока инфлација, се најновите економски прогнози на Блокот, јавува Агенција Анадолија (АА).
Се проценува дека инфлацијата во еврозоната годинава ќе достигне стапка од 7,6 отсто, а следната година ќе падне на 4 отсто.
Во јуни индексот на потрошувачките цени во еврозоната е зголемен за 8,6 отсто во однос на претходната година.
„Руската војна против Украина продолжува да фрла долга сенка врз Европа и нашата економија“, изјави потпретседателот на Европската комисија, Валдис Домбровскис.
Војната доведе до зголемување на цените на енергијата и храната, што предизвика високи стапки на инфлација и оптоварување на економскиот раст и довербата на потрошувачите. Се зголемуваат стравувањата дека енергетската криза би можела да се влоши доколку Русија дополнително ги прекине испораките на природен гас или целосно ги затвори вентилите додека европските земји се обидуваат да ги надополнат своите резерви пред зимата.
„Ризиците за прогнозата на економската активност и инфлацијата во голема мера зависат од развојот на војната, особено од нејзините импликации врз снабдувањето со гас во Европа“, се вели во соопштението на Европската комисија.
За работите да бидат уште потешки, неодамнешниот раст на случаите на Ковид-19 предизвикува нови потешкотии.
„Не може да се исклучи можноста нова пандемија во ЕУ да донесе нови нарушувања во економијата“, се наведува во соопштението.
Енергијата претставува голем предизвик за ЕУ, која со години во голема мера се потпира на руската нафта, јаглен и природен гас за автомобилите, фабриките, системите за греење и електраните.
Претседателката на Европската комисија, Урсула фон дер Лајен, на почетокот на јули потврди дека Блокот работи на план за решавање на енергетската криза, кој ќе биде објавен кон средината на месецот.
