Вицепремиерот Битиќи: „Оваа година исплатени рекордни 45 милиони евра државна поддршка кон компаниите“

СКОПЈЕ (АА) - Вицепремиерот на Република Северна Македонија задолжен за економски прашања и координација со економските ресори и инвестиции, Фатмир Битиќи, на прес-конференција ги презентира исплатите за државна помош за 2022 година, јавува Агенција Анадолија (АА).

Како што истакна вицепремиерот Битиќи, согласно со планот за економски раст поставен во 2017 година, оваа година се поддржани вкупно 645 компании.

„Во оваа година, вкупна државна финансиска поддршка според Законот за финансиска поддршка на инвестиции и Законот за контрола на државна помош се исплатени рекордни 45 милиони евра. Ги избришавме разликите помеѓу домашните и странските компании. Денес, сите компании кои работат во нашата земја се наши, домашни, со исти услови и можности да добијат поддршка од државата“, рече Битиќи.

Тој објасни дека согласно со Законот за финансиска поддршка на инвестиции во 2022 година се потпишани 277 нови договори, истакнувајќи дека ова е убедливо најголема бројка на потпишани договори во текот на една година.

Вкупно 410 компании со исплатени 23 милиони евра се подржани согласно со овој закон. Овие компании реализирале инвестиции од 100 милиони евра, имаат отворено нови 2.000 работни места, а вкупно имаат 27.431 вработен.

Битиќи рече дека со направените измени во Законот за финансиска поддршка на инвестиции се стимулираат компаниите за инвестирање во помалку развиените региони, додавајќи дека оваа мерка дава резултати.

Тој, исто така, истакна дека оваа година 15 компании биле поддржани со 1,9 милиони евра при инвестирање во истражување и развој.

Покрај Законот за финансиска поддршка на инвестиции, компаниите се помагаат и преку Законот за контрола на државна помош, со учество и на Дирекцијата за технолошки-индустриски развојни зони.

Според овој закон, за реализирани инвестиции во висина од над 93 милиони евра, на 23 компании им е исплатена државна помош од 22 милиони евра.

- Презентиран првиот дигитален асистент од државна институција -

Вицепремиерот Битиќи, исто така, информира дека од следната година ќе биде промовиран првиот дигитален асистент во државна институција. Тој истакна дека дигиталниот асистент ќе ги направи достапни сите информации, повици и процедури за добивање државна помош, а во следната фаза и ќе замени дел од грижата за корисници.

„Со цел зголемување на транспарентноста, минатата година за првпат започнавме со креирање на првиот дигитален асистент за државна помош, кој е базиран на вештачка интелигенција. Еве, денеска можам да ви го откријам овој прв дигитален асистент во државна институција“, рече Битиќи.

Тој истакна дека дигиталниот асистент ќе се вика Ада, по инспирација од Ада Лавлејс, која се смета за првата жена програмерка.