„Тојота“ привремено ќе запре 27 производствени линии во Јапонија поради проблем во снабдувањето на чипови

ТОКИО (АА) - Производителите имаат проблеми со производството и снабдувањето на глобално ниво поради зголемената побарувачка на чипови за паметни телефони и опрема за 5Г-мрежа, јавува Агенција Анадолија (АА).

Автомобилскиот гигант „Тојота“ издаде соопштение во кое се наведува дека компанијата привремено ќе запре 27 производствени линии во 14 фабрики во земјата поради проблемот со снабдувањето на чипови.

Јапонската компанија објави дека таа практика ќе резултира со 40 % намалување на претходно објавените месечни стапки на производство.

Во соопштението се истакнува дека тринеделната суспензија ќе влијае во производството на моделите „yaris compact“, „prius hybrid“ и RAV4.

Од друга страна, „Тојота“ информира дека нејзините производствени капацитети во јужноазиските земји, меѓу кои се Тајланд и Виетнам, имале проблеми со резервни делови поради епидемијата на новиот тип коронавирус (Ковид-19).