Црна Гора: Уапсени повеќе лица, меѓу нив и претседателот на Општина Будва, Мило Божовиќ

ПОДГОРИЦА (АА) - По налог на Специјалното државно обвинителство, денеска во повеќе црногорски градови извршено е апсење на повеќе лица, во акција насочена кон борбата против организираниот криминал. Меѓу уапсените е и претседателот на Општина Будва, Мило Божовиќ, јавува Анадолу.

Божовиќ се сомничи за формирање криминална организација и неовластено производство, држење и пуштање во промет опојни дроги.

Државниот обвинител и портпарол на Специјалното државно обвинителство, Вукас Радоњиќ, соопшти дека Божовиќ е уапсен од Специјалното полициско одделение, по налог на државниот обвинител.

„Бидејќи постојат основи на сомнение дека сторил кривично дело формирање криминална организација и три кривични дела неовластено производство, држење и пуштање во промет опојни дроги“, наведе Радоњиќ.

Тој истакна дека полицијата претходно извршила претрес на становите и други простории што ги користи Божовиќ.

„Лицето лишено од слобода ќе биде спроведено на сослушување кај државен обвинител како осомничено во законскиот рок“, рече Радоњиќ.