Турската министерка Ѓокташ: „Туркије е секогаш со БиХ, болката на Сребреница ја чувствуваме длабоко во срцата“

ПОТОЧАРИ (АА) - Турската министерка за семејство и социјални услуги, Махинур Оздемир Ѓокташ, денес во Поточари, каде што присуствуваше на комеморацијата и последното испраќање на 30-те жртви на геноцидот во Сребреница, изјави дека нејзината земја секогаш е со жртвите и против насилниците, јавува Анадолу.

Потсетувајќи дека геноцидот во Сребреница е една од најголемите трагедии на европска територија по Втората светска војна, Ѓокташ рече дека „Сребреница е раната на Европа што сè уште крвави“.

- Со жртвите, а против насилниците

„Денес сме тука за збогување со 30 наши браќа, муслиманите од Босна. Семејствата се уништени од болка, но им олеснува фактот што барем имаат гробови што можат да ги посетат и каде можат да се молат. Туркије е секогаш, секаде во светот, со жртвите и против криминалците и насилниците“, изјави Ѓокташ, велејќи дека жртвите на геноцидот сѐ уште се погребуваат, дури и 28 години по завршувањето на војната.

Нагласувајќи дека Туркије е секогаш со Босна и Херцеговина, Ѓокташ рече дека нејзината земја ќе продолжи да ги поддржува интегритетот на БиХ и нејзиниот развој во мир и просперитет.

Таа потсети на зборовите на првиот претседател на Босна и Херцеговина, Алија Изетбеговиќ, дека заборавениот геноцид се повторува. Ѓокташ, исто така, рече дека поради ова, таа ќе работи на секое место за да не се заборави геноцидот во Сребреница.

- Болката на Сребреница се чувствува длабоко во срцето

Заменик-претседателот на турската Партија на правдата и развојот (АК Партија), Ефкан Ала, рече дека геноцидот во Сребреница е еден од најголемите масакри што некогаш ги видело човештвото.

Наведувајќи дека Туркије отсекогаш била со Босна и Херцеговина, Ала рече дека „сите заедно делиме иста судбина“.

„Оваа болка ја чувствуваме длабоко во нашите срца. Затоа секојпат доаѓаме тука во знак на солидарност со нашите браќа. Јасно е дека меѓународниот систем во тоа време пропадна. Нашите браќа се собраа тука под покровителство на Обединетите нации, со нивната гаранција тука тие беа подложени на геноцид. Всушност, ова е срам за човештвото. Нашите браќа тука знаат дека ние секогаш сме со нив“, рече Ала.