Средба на Вучиќ со Соботка: Белград е целосно посветен на дијалогот со Приштина

БЕЛГРАД (АА) - Претседателот на Република Србија, Александар Вучиќ, денес се сретна со претседателот на Парламентот на Република Австрија, Волфганг Соботка, јавува Анадолу.

Службата за соработка со медиумите на претседателот на Србија соопшти дека Вучиќ во таа прилика нагласил дека Австрија е важен партнер на Србија во различни области, а особено во доменот на економската соработка, која очекува дополнително да се зајакне.

„Претседателот Вучиќ истакна дека Србија многу ја цени поддршката на Австрија на патот кон членството во ЕУ, како и за одржување на мирот и стабилноста во регионот на Западен Балкан“, се наведува во соопштението.

Се додава дека Вучиќ истакнал дека Белград е целосно посветен на дијалогот со Приштина и подготвен е да работи на имплементацијата на концептот на европскиот предлог, со одредени ограничувања во согласност со принципите на меѓународното право. На претседателот на австрискиот Парламент му ги предочил овие ограничувања, како и неопходноста од формирање на Заедницата на српски општини, односно Приштина да ги исполни обврските од Бриселскиот договор и другите претходни договори.

„Двајцата соговорници се согласија дека парламентарната соработка е многу важна за билатералните односи меѓу Србија и Австрија и дека посетата на претседателот на австрискиот Парламент, Соботка, дава голем поттик за зајакнување на врските меѓу двете земји“, се додава во соопштението.