Скопје: Протести пред Собранието каде се одржува седницата за францускиот предлог за деблокирање на евроинтеграциите

СКОПЈЕ (АА) - Демонстрантите кои протестираат против францускиот предлог за решавање на спорот помеѓу Северна Македонија и Бугарија денеска напладне продолжија со протестите пред Собранието на Северна Македонија, јавува Агенција Анадолија (АА).

Денеска во Собранието на РСМ се одржа 80. седница, на која се обрати претседателката на Европската комисија, Урсула фон дер Лајен. Потоа започна 81. седница, на која пратениците расправаат за францускиот предлог за преговарачката рамка за земјата со Европската Унија (ЕУ).

За тоа време, демонстрантите фрлаа со јајца кон зградата на Собранието на РСМ, искажувајќи го своето незадоволство од францускиот предлог.

На 30 јуни до Владата на Република Северна Македонија (РСМ), од француското Претседателство пристигна модификуван предлог, по што започна широк консултативен процес.

Потоа, Владата на РСМ го испрати францускиот предлог до Собранието на РСМ за донесување понатамошни одлуки.

Граѓаните во изминатите денови протестираат против францускиот предлог, сметајќи дека тој е „штетен и неприфатлив“. Протестирајќи секојдневно пред зградата на Владата, Министерството за надворешни работи, Министерството за правда и Собранието на РСМ, демонстрантите бараа оставка од Владата и отфрлање на францускиот предлог.

Протестите се поддржани од опозициските партии ВМРО-ДПМНЕ и Левица.

Францускиот предлог е документ кој треба да доведе до отстранување на двегодишното вето од страна на Бугарија за започнување на преговорите на Северна Македонија за зачленување во ЕУ.