Продолжуваат протестите во Србија, демонстрантите фрлаа јајца кон полицијата

НОВИ САД (АА) - Незадоволните српски граѓани утринава фрлаа јајца кон полицијата и зградата на Собранието на Нови Сад, каде што се одржа седницата за избор на нов градоначалник на Општината, јавува Анадолу.

Демонстрантите се собраа пред почетокот на седницата, каде што беа пречекани со огради околу зградата, како и полициски сили. На новинарите, по ригорозни проверки, им беше дозволен влез во зградата, а на пратениците од опозицијата не им беше дозволено да влезат.

Потоа демонстрантите почнаа да фрлаат јајца, погодувајќи ги полициските сили и зградата на Собранието во Нови Сад.

Активирани беа и силите на жандармеријата, но тоа не ги спречи демонстрантите што, освен јајца, користеа и црвена боја, тоалетна хартија и брашно.

Во меѓувреме, внатре во објектот Жарко Мичин беше избран за градоначалник на Општината од владејачката Српска напредна партија на седница без претставници на опозицијата.

Мичин е адвокат и до неодамна беше шеф на Кабинетот на српскиот премиер во заминување, Милош Вучевиќ.

Покрај овој протест, студентите продолжуваат со блокадите и протестите, со барања за кривична и политичка одговорност за уривањето на натстрешницата на Железничката станица во Нови Сад на 1 ноември 2024 година, кога животот го загубија 15 лица.