Потпишан протокол за соработка во областа на тероризмот помеѓу Македонија и Албанија

СКОПЈЕ (АА) - Денеска во Охрид се одржа средба на министрите за внатрешни работи на Република Македонија и Република Албанија, Оливер Спасовски и Фатмир Џафај, пренесува Anadolu Agency (AA).

Како што информираше Министерството за внатрешни работи на Македонија, двајцата министри, по средбата истакнале дека, МВР на Република Македонија и МВР Република Албанија имаат одлична соработка и таа во наредниот период дополнително ќе се унапредува.

Од МВР информираат дека средбата во Охрид била искористена за унапредување на соработката, пред се за заедничко справување со прекуграничниот криминал во делот на илегалната миграција и борбата против трговијата со дрога, како и поддршката во регионалните и меѓународните организации, каде двете држави се членки.

Министрите Спасовски и Џафај потпишале и протокол за соработка во областа на тероризмот.

Целта на протоколот, како што се наведува во соопштението на МВР; е зајакнување на полициската соработка во борбата против тероризмот и финансирањето тероризам, првенствено преку размена на информации за поединци и групи вклучени во вакви активности, како и спроведување на заеднички операции во спроведување на истите.

„Задоволство ми е што денеска бевме домаќини на делегацијата на министерството за внатрешни работи на Република Албанија. Особено е важно што денеска го потпишавме протоколот за соработка во борбата против тероризмот, глобална закана која што бара да има соработка меѓу државите и размена на информации. Исто така разговаравме како да ја зајакнеме соработката во борбата против трговијата со дрога, оружје и луѓе", рече министерот Спасовски.

Тој информираше дека со неговиот колега од Албанија, разговарале и околу иницијативата која што ја покренал токму министерот за внатрешни работи на Република Албанија за формирање на регионален центар за полициска соработка за земјите од Западниот Балкан, што, како што рече, со задоволство се прифаќа.

„Се договоривме и да подготвиме заеднички проекти за прекугранична соработка со кои што ќе аплицираме за средства од Европската унија", рече министерот Спасовски, кој потенцираше дека денешната средба била успешна, со силна порака за пријателство.

Министерот Џафај потенцира дека нема ниту едно спорно прашање меѓу министерствата на двете земји.

„Соработката меѓу двете министерства, меѓу двете држави е одлична. Овој однос што го воспоставивме како министерства може да служи како модел во регионот. Со задоволство очекувам посета од министерот Спасовски во Тирана или Поградец", рече министерот Џафај.