Поради порастот на бројот на заразени со Ковид-19, Црна Гора ја забрани работата на дискотеките и ноќните клубови

ПОДГОРИЦА (АА) - Работата на ноќните клубови и дискотеки во Црна Гора е забранета од денеска до 2 август, предвидено е со новите мерки за борба против пандемијата на новиот вид коронавирус (Ковид-19), јавува Агенција Анадолија (АА).

Новите мерки донесени денеска се резултат на зголемувањето на бројот на новозаразени со коронавирусот во Црна Гора во последните денови, особено во приморските општини.

Директорот на Институтот за јавно здравје (ИЈЗ), Игор Галиќ, на прес-конференција изјави дека забраната се однесува на работата на ноќните клубови и дискотеки, како на отворено, така и во затворен простор.

Галиќ истакна дека очекуваат ноќните клубови и дискотеките, доколку епидемиолошката ситуација е поволна, повторно да започнат со работа на 2 август.

„Но, само за оние кои се целосно вакцинирани или ја примиле првата доза или поседуваат негативен ПЦР-тест или доказ дека го прележале коронавирусот, односно дека поминале помалку од 180 дена од позитивниот ПЦР-тест“, прецизира Галиќ.

Со новите мерки се забрануваат и забавите и музичките фестивали, како и какви било масовни собири во затворен простор.

„Очекуваме овие собири да бидат дозволени повторно од август, но само за оние кои се целосно вакцинирани или ја примиле првата доза или имаат негативен ПЦР-тест или доказ дека го прележале коронавирусот, односно поминале помалку од 180 дена од позитивниот ПЦР-тест“, наведе Галиќ.

Како што рече Галиќ, во ниту еден од овие случаи не се прифаќа брз негативен антигенски тест, ниту тест за антитела.

Тој рече дека епидемиолошката ситуација во Црна Гора и понатаму е поволна.

„Освен што ќе ги избегнат најтешките форми на болеста, очекуваме токму оние што се вакцинирани да бидат во предност во претстојниот период“, додаде Галиќ, со напомена дека во последно време се разболуваат млади и невакцинирани лица до 29 години.

„Не треба да заборавиме дека многу од нив се асимптоматски и можат да ја пренесат инфекцијата на постарите лица кои манифестираат потешки форми на болеста“, рече директорот на ИЈЗ.

Тој истакна дека дури и вакцинираните лица можат да се разболат, во одредена форма, но дека вакцината спречува потешка форма на болеста и смрт.

Галиќ соопшти дека 153 туристи се позитивни на коронавирусот.

„Имаме над 100.000 туристи, од кои 11.450 се тестирани. Само 153 беа позитивни и сите беа проследени“, рече Галиќ.

Тој појасни дека позитивните на вирусот остануваат во сместувачките капацитети во кои се наоѓаат и дека се следат нивните контакти.