Abdula Berisha
02 Јули 2021•Ажурирај: 03 Јули 2021
ОХРИД
Претседателот на Северна Македонија, Стево Пендаровски, го одржа главното обраќање на пленарната сесија на високо ниво под наслов „Ресетирање на синергијата меѓу ЕУ и САД кон Западен Балкан“, што се одржа во рамките на Преспа Форумот за дијалог (ПФД), јавува Агенција Анадолија (AA).
Претседателот Пендаровски рече дека е малку веројатно дека ќе има возобновување на синергијата меѓу ЕУ и САД кон Западен Балкан како во 1990-тите години, што, според него, е негативна вест за регионот.
Тој истакна дека оттогаш светот видел драматична промена, додавајќи дека политичката волја не е доведена во прашање, но дека има промени во националните интереси на актерите.
„ЕУ не е способна сама да предводи, САД не би сакале да предводат сами, а регионалните елити не се заинтересирани. Би сакал да бидам целосно искрен со сите, бидејќи и јас сум дел од тие елити, незаинтересирани да вложат напори за вистинска и целосна транформација на нашите општества“, рече Пендаровски.
Тој истакна дека резултатот од тоа е економското заостанување на Западен Балкан во споредба со ЕУ, истовремено споменувајќи го и заминувањето на младите од земјите од регионот.
„Западниот Балкан има 18 милиони жители само на хартија, додека во реалноста има 4 милиони помалку“, рече Пендаровски, додавајќи дека најпаметните, најмладата и најдинамичната сила го напушта регионот.
Меѓу другото, на панел-дискусијата присуствуваше и претседателот на Црна Гора, Мило Ѓукановиќ, претседателот на Словенија, Борут Пахор, вршителот на должноста помошник-секретар за европски и евроазиски прашања во американскиот Стејт департмент, Филип Рикер, поранешниот комесар на ЕУ за европска соседска политика и преговори за проширување, Јоханес Хан.
Да потсетиме, вчера и денеска во Охрид и Отешево во Северна Македонија за првпат се одржува Преспа Форумот за дијалог, со Конференцијата насловена „Западен Балкан: Делот што недостига да биде Европа целосна“.
