Официјално започна протестот „15 за 15“ - десетици илјади луѓе на улиците во Белград

БЕЛГРАД (АА) - Десетици илјади луѓе се собраа денеска на улиците на Белград, каде што попладнето започна масовниот антивладин протест „15 за 15“, известува Анадолу.

Звуците на свирежи и вувузели одекнуваат низ српската престолнина која е под силни безбедносни мерки. Некои демонстранти носеа транспаренти на кои пишуваше „Готово е!“, додека други скандираа „Пумпај!“, слоган што стана вообичаен за време на четиримесечните студентски протести.

Покрај студенти, на улиците има и професори, земјоделци, но и бројни други граѓани.

На протестот во Белград пристигнаа десетици илјади граѓани од цела Србија, додека вечерта пред митингот неколку илјади студенти од различни делови на Србија пеш или со велосипед пристигнаа во главниот град.

Некои луѓе се уште пристигнуваат во Народното собрание на Србија. Студентите го објавија планот на бини за протестниот митинг на плоштадот Славија и во близина на Народното собрание на Србија.

Главната бина е на плоштадот Славија, каде ќе се одржи главната програма и говорите. Во близина на паркот „Мањеж“ поставена е и мини бина каде ќе се организира пренос на говорите од плоштадот Славија.

Големиот протест што се одржува во Белград е последен од серијата протести низ Србија, предизвикани од трагедијата во Нови Сад на 1-ви ноември минатата година, кога се урна настрешница на железничка станица, при што загинаа 15 лица, а двајца беа повредени. Протестите беа предводени од студенти кои бараат одговорност и правда.