САРАЕВО (АА) - Претседавачот со Организацијата за европска безбедност и соработка (ОБСЕ) и министер за надворешни работи на Северна Македонија Бујар Османи, денеска во Сараево изјави дека борбата против корупцијата е на врвот на листата приоритети на неговото претседавање, јавува Анадолу.
По состанокот со министерот за надворешни работи на БиХ, Елмедин Конаковиќ, Османи истакна дека „борбата против корупцијата претставува клучен приоритет за регионот“ и порача дека ОБСЕ преку работата на својата мисија одиграло важна улога во изготвувањето на клучните прописи во таа сфера.
„Свесни за нејзината голема важност, борбата против корупцијата ја ставивме на врвот на листата приоритети на нашето претседавање. ОБСЕ ќе продолжи со поддршката на властите на Босна и Херцеговина во нивните настојувања да обезбедат ефективно спроведување на постојните закони и прописи за борба против корупцијата и казнувањето на извршителите на делата на корупција“, порача Османи.
Тој изјави дека за него е привилегија да престојува во БиХ во својство на претседавач со ОБСЕ. Истакна дека со Конаковиќ имале позитивен и конструктивен состанок на кој разговарале за билатералните односи меѓу Босна и Херцеговина и Северна Македонија, но дека фокусот бил на ОБСЕ.
„Разговаравме и за актуелните приоритети на нашата организација, како и за соработката меѓу ОБСЕ и Босна и Херцеговина, која е држава домаќин на една од најголемите операции на ОБСЕ на терен. Како што знаете, ОБСЕ минува низ период исполнет со бројни предизвици. Принципите на Хелсиншкиот завршен документ се срушени со војната што Русија ја води во Украина. Но, не сме подготвени на предавање. Сосема спротивно, за време на нашето претседавање решени сме да ги зачуваме нашите заеднички вредности и обврски, додека трагаме по можности за повторно воспоставување на дијалогот, кој претставува основен столб на нашата соработка“, истакна Османи.
Додаде дека последиците од војната се многу сериозни и претставуваат сè поголем проблем за сите држави и нивните народи, што, како што рече, е уште една причина да се „оствари уште поинтензивна соработка и да се трага по координиран регионален одговор“.
„Сето ова подеднакво се однесува и на нашиот регион - Југоисточна Европа. Години претходно тргнавме на патот на реформите и развојот. Многу е важно тешките години од нашето минато да останат зад нас и заедничкиот поглед да го свртиме кон иднината, заедно и обединети. За таа цел, повторив во мојот разговор со министерот Конаковиќ колку е важно Босна и Херцеговина да започне ефикасен дијалог на доверба, да ги премости разликите и да најде пат за надминување на несогласувањата и предизвиците“, порача Османи.
Тој додаде дека соработката меѓу Босна и Херцеговина и ОБСЕ довела до создавање бројни добри примери кои можат да се применат на други места и со тоа да придонесат за реализација на важните јавни политики и процеси.
„ОБСЕ и понатаму ќе ги поддржува и промовира активностите за градење доверба, какви што видовме на подрачјето на Мајевица, каде што настана приказната за успешна меѓуентитеска соработка на петте општински градоначалници, кои го надминаа наследството на војната и сега градат мостови и реализираат проекти насочени кон зајакнување на економскиот развој во користа на жителите на своите заедници“, рече Османи.
На крајот тој порача дека воден од заедничките вредности и обврски ќе работи на промовирање на мирот и стабилноста за време на претседавањето со ОБСЕ.
- Конаковиќ по средбата со Османи: Утврдено е значењето на мисијата на ОБСЕ во БиХ -
Во обраќањето за новинарите по средбата, министерот за надворешни работи на БиХ, Елмедин Конаковиќ, рече дека денеска „во време на агресија врз Украина, мисијата на ОБСЕ е уште поважна“, заблагодарувајќи му се на Османи за енергијата што ја вложува за зачувување на стабилноста на оваа организација и нејзината целосна функционалност во ова тешко време.
„Разговаравме за тоа како вредните луѓе од мисијата често ги решаваат проблемите на терен, преку добра комуникација и соработка со локалните заедници, со кантоналните и ентитетските влади, а таму проектите се многу мерливи и видливи“, нагласи Конаковиќ.
Тој се заблагодари и за пристапот и детектирањето на приоритетите кога се во прашање земјите од Западен Балкан.
„Таков вид соработка и поддршка е многу важна, бидејќи на земјите од Западен Балкан или Југоисточна Европа, како што сакам да кажам, во овој моментум во кој имаат шанса побрзо да се приклучат на европското семејство, им треба секој можен облик на поддршка. ОБСЕ е организација која навистина ни ја обезбедува“, истакна Конаковиќ.
Тој додаде дека отвориле важна тема и во Босна и Херцеговина.
„Таа се однесува на регуларноста на изборите, тема која постојано нè мачи на секој изборен циклус. Мислам дека заедно можеме да направиме одреден напредок кога се во прашање суштинските измени во законот и техничките решенија во рамките на функционирањето на Централната изборна комисија кои можат да бидат многу подобри од денес“, рече Конаковиќ.
