Невреме го зафати регионот, оштетени се бројни објекти, возила и посеви

САРАЕВО (АА) - Невреме проследено со голем град, дожд и силен ветер ја зафати Словенија вчера, а потоа и делови од Хрватска, Босна и Херцеговина и Србија, јавува Анадолу.

На социјалните мрежи се објавени видеа кои покажуваат силно невреме на територијата на Словенија и Хрватска. Во некои делови на Словенија падна крупен град кој ги скрши стаклата на автомобилите. Во Хрватска најтешко е погодена Општината Бошњаци.

Дирекцијата за цивилна заштита на Министерството за внатрешни работи на Хрватска соопшти дека невреме проследено со дожд, град и силен ветер на 1 и 2 јули 2024 година ја зафатило територијата на повеќе жупании.

„Апелираме до граѓаните, особено до постарите, да не се качуваат на оштетените покриви, туку да ја почекаат помошта од надлежните служби“, се наведува во соопштението.

Припадници на Цивилната одбрана и вработени во Општина Бошњаци, заедно со градежни инженери, заминаа во обиколка на Општината за евидентирање на предизвиканата штета на објектите. Помошта во најлони за покривање на покривите пристигна во Бошњаци и ќе се дистрибуира според потребите.

На една снимка снимена од возач во Ново Место, недалеку од словенечко-хрватската граница, откако бил принуден да го запре автомобилот покрај патот, може да се види како паѓа крупен град, распукувајќи го предното стакло на автомобилот.

Невремето потоа зафати делови од Хрватска, а медиумите известуваат дека невремето со силни ветрови кратко се задржало и во главниот град Загреб. Во некои делови од ова подрачје има паднати дрвја, паднати фасади на згради, а имаше и поплави.

Материјална штета има и во делови од Србија и Црна Гора.

Од невремето беа зафатени и делови од јужна, централна и северна Босна и Херцеговина, каде најмногу ги зафати Требиње и Орашје.