Aldijana Hadzic
09 Јули 2020•Ажурирај: 13 Јули 2020
СРЕБРЕНИЦА
Меморијалниот центар „Сребреница“ денеска на јавноста ѝ ја претстави дигиталната изложба „Лични предмети на жртвите од геноцидот во Сребреница“, со што е заклучена првата фаза во долгорочниот проект на воспоставување на музејската колекција на лични предмети, јавува Агенција Анадолија (АА).
„Со дигиталната изложба, која е направена на англиски и босански јазик, одлучивме да ја приближиме нашата работа на трагање по личните предмети. Пред сѐ, тука сакам да се заблагодарам на Азир Османовиќ, Ахмо Мехмедовиќ и Реџеп Устиќ, кои ја реализираа оваа дигитална изложба, но и на целиот тим кој правеше обиколка на теренот и ја организира рутата „Марш на смртта“, тим кој комуницираше со семејствата. Се надевам дека ја оправдавме довербата на луѓето и дека ова е само почеток“, изјави директорот на Меморијалниот центар „Сребреница“, Емир Суљагиќ.
Меморијалниот центар во Сребреница е првата институција во БиХ која покрена виртуелни тури за време на пандемијата на Ковид-19, во последните четири месеци реализираше над 40 онлајн едукациски сесии со универзитети и академски институции низ светот, а преку онлајн кампањи на социјалните мрежи нивните многубројни проекти ги имаат видено над еден милион луѓе.
„Имаме голем број партнери во организациите и музеите со кои работиме. Во овие денови од јули некако и немаме време да погледнеме наназад, реализирани се многу проекти, изложби, истражувачки работи и публикации што ги презентираме и за кои зборуваме деновиве. Нашиот куратор Хасан Хасановиќ само денеска зборуваше на три конференции. Утре имаме голема конференција за борба против негирањето на геноцидот. Вечерва, заедно со Шејла Камериќ и „Интернет контрол месиџинг протокол“ [Internet Control Messageing Protocol ICMP], најавуваме нов проект, Форензичка архива“, рече Суљагиќ.
Според неговите зборови, овој тим на одлични експерти поврзан со младите луѓе кои доаѓаат од различни делови на БиХ се собраа и покрај пандемијата на Ковид-19, и покрај сите други таканаречени одвраќања, тие сакаат да покажат дека светот сè уште ја препознава важноста на лекциите за кривичното дело „Геноцидот во Сребреница“.
„Тоа е важно за иднината на нашата држава и општество, важно за дијалогот и важно за трајниот мир, заклучи Суљагиќ“, се наведува во соопштението на Меморијалниот центар „Сребреница“.
