Admir Fazlagic
10 Декември 2016•Ажурирај: 10 Декември 2016
СКОПЈЕ (АА) - Денеска во Македонија е предизборен молк во пресрет на неделните, четврти во низа, предвремени парламентарни избори, јавува Anadolu Agency (AA).
Изборната кампања која траеше дваесет дена заврши на полноќ.Според македонското изборно законодавство, гласањето денеска се спроведува во дијаспората, за пријавените болни и изнемоштени лица и за затворениците и лицата во притвор.
Избирачките места се отворени во 7:00 часот, а гласањето завршува во 19:00 часот. Во дијаспората тоа ќе се спроведува по локално време.
На изборите учествуваат 11 политички субјекти: шест политички партии и пет коалиции со 58 листи на кандидати.
Пријавени за гласање во странство се 20.573 граѓани, додека на посебниот Избирачки список се запишани 230.122 лица кои согласно евиденцијата на надлежен орган се смета дека се на привремена работа во странство.
Своето право на глас во странство државјаните на Република Македонија ќе можат да го остварат во 41 дипломатско-конзуларно претставништво и конзуларни канцеларии. Најмногу пријавени за гласање има во Берна 4.256, во Венеција, 2724, во Детроит 1.170, Њујорк 1.168, Мелбурн 1112... За овие избори за гласањето во Берн отворени се три дополнителни избирачки места, додека во Венеција две. Најмалку пријавени има Мадрид - 10, во Пекинг 13 и во Варшава 14 гласачи.
Гласање денеска се спроведува и за 2.015 затвореници и лица во притвор. Дома или на адреса каде што се пријавени денеска гласаат и болните и немоќните. Гласаат и 13 внатрешно раселени лица.
За утрешните деветти парламентарни избори, во Избирачкиот список запишани за гласање се 1.784.416 полнолетни државјани на Република Македонија. Изборите ќе се спроведуваат на 3.480 избирачки места во шест изборни единици во Македонија и во 46 во седмата изборна единица што ја опфаќа дијаспората.
Инаку, предвремените парламентарни избори закажани за 11 декември се резултат на договорот меѓу лидерите на четирите најголеми политички партии во земјата (ВМРО-ДПМНЕ, СДСМ, ДУИ и ДПА), кои по долги преговори на 31 август се согласија околу одржувањето на изборите, со цел земјата да излезе од политичката криза.
